Library
Profile
ଉଲକାପାତିଆ ଡେଉଁଥିଲି
ଉଲକାପାତିଆ ଡେଉଁଥିଲି
ସରବତରେ ଚିନି ମିଳେଇଯିବା ପରି
ପଖାଳରେ ଲୁଣ ଗୋଳେଇଯିବା ପରି
ତୁମ ମହୁଲି କଥାରେ
ତୁମ ନିଳାଭ ଆଖିରେ
ଗୋଳେଇ ମିଳେଇ ବାରମ୍ବାର ଯାଉଥିଲି
ତୁମ ଲାବଣ୍ୟ ଛଟାରେ
ତୁମ ମୁରୁକି ହସରେ
ଅସ୍ତିତ୍ବହୀନ ଥରକୁ ଥର ହେଉଥିଲି
ଆଉ ଶେଷରେ ଏକାନ୍ତରେ
ଶୀତ ରାତିର ନିଭୃତ କୋଣରେ
ପଲଙ୍କରେ ମାରୁଥିଲି ଅନ୍ତହୀନ ଚକାଭଉଁରି
ଫୁଟିଲା ଫୁଲ ପାଖୁଡ଼ା ପରି
ପାଚିଲା ଫଳ ସମ୍ଭାର ପରି
ତୁମକୁ ମୁରୁକି ହସୁଥିବାର ଦେଖି
ମୁଁ ବି ଆପେଆପେ ମୁରୁକି ଦେଉଥିଲି
ଆଖିରେ ଠାରି ଦେଉଥିଲି
ଅଙ୍ଗ ଭଙ୍ଗୀରେ କହୁଥ
ିଲି
ମୁଁ ବି ଗାରଡମେଣ୍ଢା ପରି ଅନୁଧାବନ କରୁଥିଲି
ସତେ ଯେମିତି ଉଜାଣି ସ୍ରୋତରେ
ଭାସି ଚାଲିଲି ସୁଅ ମୁଁହରେ ପତର ପରି
ନିଜର ଅଗଣିତ ସମସ୍ୟା ଜଞ୍ଜାଳ
ତେଲ ଲୁଣର ବିକଟାଳ ହଳାହଳ
ସବୁ ଭୂଲି ଯାଉଥିଲି
ତୁମକୁ ମନେ ମନେ ଭଲ ପାଉଥିଲି
ତୁମ ପାଖେ ପାଖେ ରହିଲେ
ଲାଖି ଲାଖି ବସିଲେ ଶୁଣିଲେ
ଚିନ୍ତା ରହିତ ସମସ୍ୟା ବାଧିତ ହେଉଥିଲି
କାରଣ କଣ ଜାଣିନି
ବାରଣ କଣ ମାନିନି
ସବୁ ଜାଣି ବି ଅଜଣା ରହୁଥିଲି
ଆଉ ମନେ ମନେ ଖୁବ୍ ଖୁସିରେ ବୁଲୁଥିଲି
ବାଛୁରି ଛୁଆ ପରି ଉଲକାପାତିଆ ଡେଉଁଥିଲି
