ସବୁ ହେଲା ଅକାରଣ ଗୋ

ଏତେ ସଜ ମୋତେ କରିଥିଲ ସଖି

ସବୁ ହେଲା ଅକାରଣ ଗୋ ,

ପ୍ରତୀକ୍ଷାରେ ସାରା ରାତି ବିତିଗଲା

ନଇଲେ ମୋ ଶ୍ୟାମଘନ ଗୋ ।(୦)

ସବୁ ହେଲା ଅକାରଣ ଗୋ....

ଅତି ଯତନରେ ପୟରେ ମୋହର

ଅଳତାର ଧାର ଦେଇ ଗୋ,

ଝୁଣ୍ଟିଆ,ନୂପୁର ଖଞ୍ଜି ଦେଇଥିଲ

ରୁଣୁଝୁଣୁ ବାଜୁଥାଇ ଗୋ ।

ହସ୍ତରେ କୁଙ୍କୁମ,କଙ୍କଣ,ବାହୁଟି,

ଚୁଡ଼ି କେତେ ଶୋଭାବନ ଗୋ ।(୧)

ପ୍ରତୀକ୍ଷାରେ ସାରା ରାତି ବିତିଗଲା

ନଇଲେ ମୋ ଶ୍ୟାମଘନ ଗୋ....

ଗଳାରେ ପିନ୍ଧାଇ ରତ୍ନହାର ସଖି

କର୍ଣ୍ଣରେ କୁଣ୍ଡଳ ଦେଲ ଗୋ ,

ଗଭାରେ ମଲ୍ଲୀର ଗଜରା ମଣ୍ଡାଇ

ନୀଳ ଶାଢ଼ୀ ପିନ୍ଧାଇଲ ଗୋ ।

ମଥାମଣି ସହ ନାକରେ ବସଣି

ସବୁ ହେଲା ଅକାରଣ ଗୋ ।(୨)

ପ୍ରତୀକ୍ଷାରେ ସାରା ରାତି ବିତିଗଲା

ନଇଲେ ମୋ ଶ୍ୟାମଘନ ଗୋ....

କେତେକଥା ମୁହିଁ ଭାବି ରଖିଥିଲି

ତାଙ୍କ ଆଗେ କହିବାକୁ ଗୋ ,

ଚରଣ ଯୁଗଳେ ନିଉଛାଳି ହୋଇ

ହୃଦେ ଚାପି ଧରିବାକୁ ଗୋ ।

ଦଇବ ଭିଆଣ ଆନ କିଛି ପରା

ଦହଗଞ୍ଜ ହୁଏ ପ୍ରାଣ ଗୋ ।(୩)

ପ୍ରତୀକ୍ଷାରେ ସାରା ରାତି ବିତିଗଲା

ନଇଲେ ମୋ ଶ୍ୟାମଘନ ଗୋ....

ସବୁ ହେଲା ଅକାରଣ ଗୋ....