ସ୍ଵାର୍ଥପର

ସବୁ ଚାହୁଛନ୍ତି ସକଳ ଦରବ ମୂଲ୍ୟ ଶସ୍ତା ହେଇଯାଉ,

ଆମ ରୋଜଗାର ଦରମା ମଜୁରି ନିତିନିତି ବଢୁଥାଉ |

ସବୁ ଚାହୁଛନ୍ତି ମୋର ପରିବାର କେବଳ ପାଆନ୍ତୁ ସୁଖ,

ସବୁଠୁଁ ଆଗରେ ଯିବି ମୁଁ ବାଗରେ ପାଇଲେ ପାଉ କେ ଦୁଃଖ |

ସବୁ ଚାହୁଛନ୍ତି ସବୁଠାରୁ ଉଚ୍ଚାକୋଠା ହେଇଥାଉ ମୋର,

ସେ ଘର ଉପରେ ନହେଉ ଚଢାଉ ନପଶୁ ସେ ଘରେ ଚୋର |

ସବୁ ଚାହୁଛନ୍ତି ସବୁଦିନ ପାଇଁ ନିରୋଗ ରହିବି ମୁହିଁ,

ଯେତେ ସବୁଭଲ ଦାମୀ-ନାମୀ ଚିଜ ଭୋଗିବି ଅମର ହୋଇ |

ସବୁ ଚାହୁଛନ୍ତି ମୋ କଥାକୁ ଶୁଣି ସମସ୍ତେ ମାରନ୍ତୁ ତାଳି,

ଆଉ କିଏ ଭଲ କହୁ ବା ନକହୁ ତାକୁ ମିଳୁଥାଉ ଗାଳି |

ବିପଦେ ଆପଦେ କଉଶଳ କ୍ରମେ ଯାଉଥିବି ସଦା ଖସି,

ଅଡୁଆ ଝମେଲା କରୁଥିବି ସିନା ଆଉ କିଏ ଯାଉ ଫସି |