ସ୍ୱପ୍ନ

ଅତି ମାନସିକ ଅଦ୍ଭୁତ ପ୍ରକ୍ରିୟା

ଅଟେ ସ୍ୱପ୍ନ ସଂରଚନା

ପ୍ରଘଟେ ନିଦ୍ରାରେ ଚଳଚ୍ଚିତ୍ର ପ୍ରାୟେ

ଭାବବୋଧ ସଙ୍କଳ୍ପନା ।

ନିର୍ଦ୍ଦିଷ୍ଟ କେଉଁଠି ମନ ଓ ମସ୍ତିଷ୍କେ

ହୁଅଇ ସ୍ୱପ୍ନ ଉଦ୍ଭବ

ଅଟଇ ଅଜଣା ଉଦ୍ଦେଶ୍ୟ ତାହାର

ଫଳାଫଳ ପରଭାବ ।

ଜୀବନର କ୍ରିୟା ଆଶା ଓ ଆକାଙ୍କ୍ଷା

ଭବିଷ୍ୟତ ସମ୍ଭାବନା

ପ୍ରତିଫଳେ ସୂକ୍ଷ୍ମେ ମାନସେ ବିଚିତ୍ର

ସପନ ଅବଚେତନା ।

ବାଧା ପ୍ରତିବନ୍ଧ ଜୀବନ ସଂଗ୍ରାମ 

ଭାବନା ଅନୁଶୋଚନା

ଆମ ଅଭିଜ୍ଞତା ପରିବର୍ତ୍ତନକୁ

ସ୍ୱପ୍ନ କରେ ସଂସ୍ଥାପନା ।

ଆଭାସୀ ସ୍ୱରୂପ ହୋଇପାରେ ସ୍ୱପ୍ନ 

ଅଳ୍ପ ବହୁ କ୍ଷଣସ୍ଥାୟୀ

ରାତ୍ର ପ୍ରତି ହାର ଅଟେ ଦୁଇ ଘଡି

ପ୍ରକାର ଭିନ୍ନ ଅଟଇ ।

ସ୍ୱପ୍ନ ସାଧାରଣ ହୁଏ ଦୃଶ୍ୟମାନ 

ଅବାସ୍ତବ ଦିବାସ୍ୱପ୍ନ 

ଉଦ୍ରେକ କରଇ ସପନ ଆହ୍ୱାନ 

କର୍ମ କରେ ଉଚ୍ଚାଟନ ।

କାମନା ବାସନା ଭୂତ ପ୍ରେତ ଭ୍ରାନ୍ତି

ବିକୃତି ମନୋଭାବନା

ମନକୁ କରଇ ଦୁର୍ବଳ ନିସ୍ତେଜ

ଘାରେ ତନ୍ଦ୍ରା ଉନ୍ମାଦନା ।

କଦବା କେମିତି ଜୀବନରେ ଥରେ

ମହାର୍ଘ ଦିବ୍ୟ ସପନ

କରେ ସଚେତନ ଗଭୀର ନିଦ୍ରାରେ

ମାର୍ଗ କରେ ଉନ୍ମୋଚନ ।