ସ୍ୱାଧୀନତା ପରେ ପରେ

ସ୍ୱତନ୍ତ୍ରତାର ସେ ଅମୂଲ୍ୟ ସ୍ୱାକ୍ଷର

ବକ୍ଷରେ ବହନ କରି ଫର ଫର

ଉଡଇ ତ୍ରିରଙ୍ଗା ଆଜି ସଗର୍ବରେ

ଲାଲକିଲାର ପ୍ରାଚୀର ଉପରେ

     ପବନର ବକ୍ଷ ଚିରି

ଆକାଶରେ ଆଜି ଶାନ୍ତି କପୋତ

ଉଡୁଛନ୍ତି ଗାଇ ମୁକ୍ତିର ଗୀତ

କହୁଛନ୍ତି ସାରା ବିଶ୍ୱକୁ ଆଜିରେ

ଚଳିବନି ଆଉ କାହାରି ଉପରେ

    କାହାର ହାକିମିଗିରି

ପରାଧୀନତାର ନିଷ୍ଠୁର ଯାତନା

ଫାସି କଳାପାଣି କେତେ କଟକଣା

ସହିଛନ୍ତି ଆମ ସଂଗ୍ରାମୀମାନେ

ଦେଇଛନ୍ତି ପ୍ରାଣ ଦେଶର କାରଣେ

     ଶୁଣି ଛାତି ଯାଏ ଥରି

ସ୍ୱତନ୍ତ୍ରତାର ଏ ପବିତ୍ର ଦିବସେ

ଆସ ଦେଶବାସୀ ଗାଇବା ସମସ୍ତେ

ବଳିଦାନର ସେ ଅମର ସଙ୍ଗୀତ

ବୀର ସଂଗ୍ରାମୀଙ୍କ ଜୀବନ ବୃତ୍ତାନ୍ତ

    ତାଙ୍କୁ ସମର୍ପିତ କରି

ଦୁର୍ଦିନର ସେହି ଅମା ଅନ୍ଧକାର

ସ୍ୱାଧୀନତା ପରେ ହୋଇଅଛି ଦୂର

ନୂତନ ଯୋଜନା ନୂତନ କଳ୍ପନା

ସାରା ଦେଶେ ଆଜି ନବ ସଂରଚନା

   ମୋ ଦେଶ ପ୍ରଗତି ପଥେ

କୃଷି, ଶିଳ୍ପ ଅବା ବାଣିଜ୍ୟ ବିଜ୍ଞାନ

ପ୍ରତି କ୍ଷେତ୍ର ଆଜି ଉନ୍ନତିର ଚିହ୍ନ

ତଥାପି ରହିଛି ଅଭାବ କଷଣ

ଦୁର୍ନୀତି ଓ ପ୍ରିୟା-ପ୍ରୀତିର ତୋଷଣ

   ହଟିବ ନିଶ୍ଚେ ତୁରିତେ

କମିଛି ସମାଜେ ସଦ୍ଭାବ ସଂପ୍ରୀତି

ଜାତି ଧର୍ମ ଦ୍ୱେଷ ହେଉଅଛି ବୃଦ୍ଧି

ଆତଙ୍କବାଦୀଙ୍କ ହୁଏ ଆକ୍ରମଣ

କରିବାକୁ ଦେଶ ପୁନଃ ବିଭାଜନ

  ହେବନି କେବେ ସଫଳ

ମୋ ଦେଶର ବୀର ଜାଗ୍ରତ ସୈନିକ

ଜଗିଛି ସୀମାନ୍ତ ସଦା ନିରିଭୀକ

ଦୃଢ ସରକାର ଟାଣୁଆ ନେତୃତ୍ୱ

ଧମକରେ କାର ନୁହେଁ ବିଚଳିତ

  ରହିଛି ସଦା ଅଟଳ