ରୂପମୟୀ ଅନାମିକା
ରୂପମୟୀ ଅନାମିକା
ବିନିଦ୍ର ରଜନୀ ନ ପାହୁ ସଜନୀ
ରହିଯାଉ କିଛି କ୍ଷଣ
ଅଭିମାନ ଛାଡି ଛାତିପରେ ଲୋଟି
ଭରିଦିଅ ଶିହରଣ ।
ପିଇବାକୁ ଦିଅ ତୁମ ଓଠ ମଧୁ
ମେଣ୍ଟିଯାଉ ମୋର ତୃଷ୍ଣା
ଅନୁଭବ ମୋତେ କରିବାକୁ ଦିଅ
ତୁମ ତନୁ ମିଠା ବାସ୍ନା ।
ଆଙ୍କିବାକୁ ଦିଅ ପ୍ରୀତିର ଚୁମ୍ବନ
ଛୁଇଁ ତୁମ ଗଣ୍ଡଦେଶ
କାଢିନିଅ ତୁମ ଲାଜର ଓଢଣୀ
ଖୋଲିଦିଅ ଘନକେଶ।
ତୋଳିନେବି ତୁମ ମୁଖ ଚନ୍ଦ୍ରମାକୁ
ମୋର ଦୁଇ ପାପୁଲିରେ
ହଜିବାକୁ ଚାହେଁ ପ୍ରିୟା ତୁମ ସେଇ
ନୀଳନୀଳ ନୟନରେ ।
ପାଦ ନୁପୁରର ନିକ୍ୱଣ ଶବଦେ
କରିଦିଅ ମୋତେ ବନ୍ଦୀ
ନୃତ୍ୟଙ୍ଗନା ସାଜି ଟାଣିନିଅ ମୋତେ
ହାତେ ମୋର ହାତ ଛନ୍ଦି ।
ଯଉବନ ହିଆ ଲଗାଉଛି ନିଆଁ
କାମନାର ଦୀପଶିଖା
ଦୂରେ ରୁହ ନାହିଁ ପାଶେ ମୋର ବସି
ରୂପମୟୀ ଅନାମିକା ।
ଭିଜିବାକୁ ଦିଅ ପ୍ରେମ ସିନ୍ଧୁନୀରେ
ନୀରବତା ଭଙ୍ଗକରି
ହୃଦୟକୁ ମୋର ଦିଅନା ବେଦନା
ମନଟାକୁ ଚୋରି କରି ।