RUPASEE
RUPASEE
![](https://cdn.storymirror.com/static/1pximage.jpeg)
![](https://cdn.storymirror.com/static/1pximage.jpeg)
ସେବତୀ କଢିରେ ମଲ୍ଲୀ ପାଖୁଡାରେ
ଉପମା ଜଗତ ଇନ୍ଦୁ,
ଚୋରା ମଳୟର ପହିଲି ପରଶେ
ରୂପଭରା କାଚକେନ୍ଦୁ ॥
ଗୋଧୂଳୀ ଦିଗନ୍ତେ ପ୍ରଦୋଷର ଅନ୍ତେ
ନିର୍ମଳ ନୀଳିମା ଭାନୁ,
ସନ୍ଧ୍ୟା ଓଢଣୀର ଲାଜୁଆ ମାନସୀ
ସଜ ବନଫୁଲ ଜାନୁ ॥
ସଂଜୁଆ ମଳୟେ ସରସୀର ଜଳେ
ଅଫୁଟା ସୁନ୍ଦରୀ କଇଁ,
ସରୋବରେ ସତେ ଲାଜୁଆ କମଳ
ପ୍ରେମରେ ଉଛୁଳା ନଈ ॥
କାନନ ଭୂଇଁର ଉଟଜ ଅବଳା
ବାସରେ ବଣ ମାଳତୀ,
ପାହାଡି କନ୍ୟାର ଲାଜୁଆ ସ୍ରୋତରେ
ସଶିଖା ବିହୀନ ବତୀ ॥
ମାନସ ଦର୍ପଣେ ବିରହର କୋଣେ
ମନକୋଣ ନବ ବଧୂ,
ଗୋଲାପ ବାଟିକା ରୂପସୀ ରାଧିକା
ରୂପ ତୁଳୀକାର ମଧୁ ॥
ସରମ ରାଇଜ ଲାଜକୁଳି ଜେମା
ଲାଜୁଆ ଓଢଣୀ ତଳେ,
ଲାଜେଇ ଲାଜେଇ କବାଟ ଫାଂକରେ
ଲାଜ ଇନ୍ଦୁ ତୁମ ଢଳେ ॥
ସପତ ରଂଗରେ ଫଗୁ ବୋଳି ଅଂଗେ
ସାଜିଅଛ ଫଗୁବାଳା,
କଳା ବଉଦର କାଳିମା ଢେଉରେ
ସାଜିଛ ଦିବ୍ୟ ଚପଳା ॥
କାଉଁରୀ ବଦନେ ବାସର ରଜନୀ
ତନୁରେ ଦେଇଛ ବାଢି,
ପ୍ରୀତି ପଲଂକରେ ଗୋଲାପ ବିଛାଇ
ବୁହାଇଛ ପ୍ରେମ ବଢି ॥