ରଥେ ବସିଛି ମୋ କାଳିଆ ସୁନା

ବରଷକେ ଥରେ ଏ ବଡ଼ଦାଣ୍ଡରେ

ଟଣା ହେବ ତିନି ରଥ,

ମନ୍ଦିର ଭିତରୁ ବାହାରକୁ ଆସି

ଦର୍ଶନ ଦେବେ ଶ୍ରୀଜଗନ୍ନାଥ ।

ଶଙ୍ଖ, ଘଣ୍ଟ ନାଦେ ଭୁବନ କମ୍ପିବ

ଆନନ୍ଦ ଖେଳିବ ତହିଁ,

ଝୁଲି ଝୁଲି ସେତ ଆସିବ କାଳିଆ

ଭାଇଭଉଣୀଙ୍କୁ ସାଙ୍ଗରେ ନେଇ ।

ରଥେ ବସି ସାରା ଦୁନିଆ ଦେଖିବ

ଦୁଇ ବାହୁକୁ ତା'ର ମେଲାଇ,

ଦୁଃଖ କଷ୍ଟ ସବୁ ଲାଘବ କରିବ

ସୁଖ ଦେଇ ନେବ କୋଳାଇ ।

ନାନା ବେଶେ ତୁମେ ସଜ୍ଜିତ ହୋଇବ

ପାଟବସ୍ତ୍ରମାନ ପିନ୍ଧି,

ପୁଷ୍ପ ସୁଗନ୍ଧେ ବଡ଼ ଦାଣ୍ଡ ଯେ ବାସିବ

ଅଙ୍ଗେ ରତ୍ନଅଳଙ୍କାର ବାନ୍ଧି ।

ଜୀବନର ରଥ ଗଡି ଗଡି ଯାଏ

ସରିଯାଉଅଛି ସବୁ ସମୟ,

ତୁମେ ରଥେ ଥରେ ଦେଖା ଦେଲେ ପ୍ରଭୁ

ଜାଗି ଉଠେ ମନେ ଭାବ ବିନୟ ।

ଭକ୍ତ ଟାଣି ନେବେ ତୁମ ତିନି ରଥ

ଯିବ ମାଉସୀ ମା' ଘରକୁ,

ନଅଦିନ ରହି ମଉଜ କରିକି

ବାହୁଡ଼ି ଆସିବ ଶ୍ରୀମନ୍ଦିରକୁ ।

ଢାଳିଦିଅ ତୁମ କରୁଣାର ସିନ୍ଧୁ

ହେ ମୋର ଭାବବିନୋଦିଆ,

ତୁମ ଆଶୀର୍ବାଦ ସଦା ରହିଥାଉ

ଏତିକି ଗୁହାରି ମୋ କାଳିଆ ।