ଆସୁଛି ରଙ୍ଗର ପର୍ବ

ଫଗୁଣମାସ ଶୁକ୍ଳପକ୍ଷ ଦଶମୀ ତିଥିରେ

ଦୋଳପୂର୍ଣ୍ଣମୀ ପାଳନ ହୁଅଇ ବିଧିରେ ।

ଋତୁଚକ୍ର ମଧ୍ୟେ ବସନ୍ତ ଋତୁରେ

ନବୀନ ଉତ୍ସାହ ମନକୁ ଉନ୍ମାଦିତ କରେ ।

ରଙ୍ଗର ପରବ ସେତ ଆସିଛି ହୋଲି

ମନୁ ରାଗ, ରୁଷା ଆମେ ଯିବାରେ ଭୁଲି ।

ପରମାରାଧ୍ୟ ଦେବତା ରାଧାକୃଷ୍ଣ ଯୁଗଳ ମୂରତି

ସୁସଜ୍ଜିତ ଦୋଳବିମାନେ ସୁନ୍ଦର ଦିଶନ୍ତି ।

ଝୁଲି ଝୁଲି କାହ୍ନୁ ଦୋଳବିମାନେ ଆସିବେ

ଆମ୍ରଫଳ,ପିଠା ଭୋଗ ଖାଇ ଆଶୀର୍ବାଦ ଦେବେ ।

ଧୂପ, ଦୀପ ନୈବେଦ୍ୟର ସୁଗନ୍ଧ ବାସ୍ନାରେ 

ପୁରପଲ୍ଲୀ ସେ ବାସ୍ନାରେ ମହକି ଉଠେରେ ।

ନାନା ପିଠା ପଣାର ବାସ୍ନା ଗୃହେ ବାସିବ

ସେ ବାସ ଚହଟି ଭୋକ ମେଣ୍ଟାଇଣ ଦେବ ।

ପଲ୍ଲୀବାସୀ ପ୍ରଭୁଙ୍କୁ ଅବିର ଅର୍ପଣ କରନ୍ତି

ପରସ୍ପର ରଙ୍ଗ ବୋଳି ଖୁସିରେ ବିଭୋର ହୁଅନ୍ତି ।

ବସନ୍ତ ମଳୟ ସଙ୍ଗେ ନାନା ରଙ୍ଗ ଉଡେ

ସେ ରଙ୍ଗ ଛିଟାରେ ଆମ ଶରୀରଟା ବୁଡ଼େ ।

ଭାବ, ପ୍ରୀତି ଭରା ଏଇ ରଙ୍ଗର ପରବ

ସଭିଏଁ ବାଣ୍ଟନ୍ତି ମିଶି ଖୁସିର ସରାଗ ।