ରଙ୍ଗମଞ୍ଚ
ରଙ୍ଗମଞ୍ଚ
ଦୁନିଆ ଟା ରଙ୍ଗ ମଞ୍ଚ ଆମେ ସବୁ କଳାକାର
ରଙ୍ଗ ବୋଳି ହୋଇ ମୁହଁ ରେ
କାହା ପାଖେ କେଉଁ ରୂପେ ହସ ଖୁସି ଦୁଃଖ କାନ୍ଦ
ଅଭିନୟ କରି ଯାଉ ରେ |
ଜନମ ଦିନ ରୁ ନେଇ ମଶାଣି ର ଜୁଇ ଯାଏ
ସତେ ଗୋଟେ ଗୋଟେ ନାଟକ
ସେହି ନାଟକ ରେ ସତେ କିଏ ଜିତେ କିଏ ହାରେ
କାହା ପାଖେ କେଉଁ ସମ୍ପର୍କ |
ମାଆ କୋଳେ ଥିଲା ବେଳେ ଶିଶୁ କଳାକାର ପରି
ମନ କିଣୁ ଥାଏ ସଭିଙ୍କ
ସେହି ଦିନେ ବଡ଼ ହେଲେ ଆପଣା ପର ର ଭାବ
ଯୋଡ଼େ ଭାଙ୍ଗେ କେତେ ସମ୍ପର୍କ |
ନାୟକ ର ଭୂମିକା ରେ କିଏ ସବୁ ସହି ଯାଏ
କିଏ ପୁଣି ଖଳନାୟକ
କାହା ଜୀବନ ଟା ଖୁସି ସତେ ହାସ୍ୟ ଅଭିନେତା
କିଏ ପାଏ ନାହିଁ ଆଲୋକ |
ସ୍ନେହ, ଶ୍ରଦ୍ଧା, ପ୍ରେମ ଭକ୍ତି କାହା ପାଇଁ ମୂଲ୍ୟବାନ
କାହା ପାଇଁ ତୁଛ ଜୀବନ
ମରି ମରି ବଞ୍ଚେ କିଏ ହରେଇବା ଦୁଃଖ ନେଇ
କାହା ପାଇଁ ମିଠା ସପନ |
ଯେମିତି ବି ଯିଏ ବଞ୍ଚୁ କିବା ଖୁସି କିବା ଦୁଃଖେ
ମୃତ୍ୟୁ ଏକା ସତ ଜୀବନେ
ସାରିଦିଏ ଶେଷ ଦୃଶ୍ୟ ସଂଳାପ ର ଅନ୍ତସ୍ୱରେ
ଧୀରେ ଧୀରେ ଆସି ଗୋପନେ |