ମୁଁ ନୁହେଁ ମୁଁ

ମୁଁ ନୁହେଁ ଏକ ମୁକ୍ତ ବିହଙ୍ଗ 

       ଉଡି ବୁଲିଯିବି ଟିକେ, 

ପକ୍ଷ ମୋର ଆଜି କ୍ଷତାକ୍ତ ହୋଇଛି 

      ସାହସ ନାଇଁ ମୋ ପାଖେ ।

ମୁଁ ନୁହେଁ କେଉଁ ଶିଳ୍ପୀ ର କୋଣାର୍କ 

       ଆଖି ଲାଖିଯିବ କା'ର 

ରାସ୍ତା କଡେ ଛିଡା ଭଙ୍ଗା କୋଠା ଘର

       ଭୁତ କୋଠି ଭାବି ପାର ।

ମୁଁ ନୁହେଁ ଏକ ସୁନ୍ଦର ବଗିଚା 

       ପ୍ରଜାପତି ମନ କିଣା 

କଣ୍ଟକିତ ଭରା ଶୁଷ୍କ ଅରଣ୍ୟ 

       ସମସ୍ତ ଙ୍କୁ ଯାହା ଜଣା ।

ମୁଁ ନୁହେଁ କେଉଁ ସ୍ରୋତସ୍ୱିନୀ ଟିଏ 

       ମେଣ୍ଟାଇ ପାରିବି ଶୋଷ, 

ମରୁ ମରୀଚିକା ପାଲଟି ଯାଇଛି 

       ଦେବି ନାହିଁ କାହା ଦୋଷ ।

ମୁଁ ନୁହେଁ କାହା ସୁଖର କାରଣ 

       ଭରିଦେବି ଟିକେ ଖୁସି, 

ଜଳୁଛି ମୁଁ ନିଜେ ଜାଳିଦେବି ସବୁ 

      ପଛରେ ହୋଇବି ଦୋଷୀ ।

ମୁଁ ଆଜି ଆଉ ମୁଁ ହୋଇ ନାହିଁ 

       ହୋଇଛି ଜିଅନ୍ତା ଶବ, 

ମୋ ଭିତରୁ ମୋତେ କାଢି ଫିଙ୍ଗିଦେଇ 

        କରୁ ଅଛ କେତେ ଗର୍ବ ।