ଜରରେ ଠାକୁର
ଜରରେ ଠାକୁର
କାଲି ଗାଧୁଆରେ ଆସିଗଲା ଜର
ମୁଣ୍ଡରେ ଢାଳିଲେ ଜଳ
ତିନି ଭୁବନର ଠାକୁର ହୋଇ ସେ
ବାଧିକାରେ ଥରହର ।
ଅଣସର ପିଣ୍ଡି ଆସ୍ଥାନ ହୋଇଛି
ଛାଡି ରତ୍ନ ସିଂହାସନ
ଜରରେ ଥରିବେ ଓଷଧ ଖାଇବେ
ହେବ ନବ ଯଉବନ ।
ପନ୍ଦର ଦିନରେ ଅଣସର ଘରେ
ଚିକିତ୍ସା ତାଙ୍କର ହେବ
ମୋଦକ ଖାଇଲେ ଉପଚାର କଲେ
ଆରୋଗ୍ଯ ଲାଭ ହୋଇବ।
ଦଇତାପତିଏ ବଇଦ ଡକାଇ
କରାଇବେ ଉପଚାର
ନାନା ଉପଚାର କରିବେ ସରବେ
ଜର ହୋଇଯିବ ଦୂର ।
ଫୁଲୁରି ତେଲକୁ ଲଗାଇ ଦେହରେ
ଚେରମୂଳିର ମୋଦକ
ଖାଇ ସୁସ୍ଥ ହେବେ ଜଗତର ନାଥ
ଜାଣିବେ ଜଗତ ଯାକ ।
ବ୍ୟାଧି ମୁକତରେ ଆନନ୍ଦିତ ହୋଇ
ପନ୍ଦର ଦିନ ଉତାରୁ
ନେତ୍ରୋତ୍ସବ ଦିନ ନବ ଯଉବନେ
ଦେଖାଦେବେ ମହାମେରୁ ।
ଦରଶନେ ତାଙ୍କ ହୃଦ ଆହ୍ଲାଦିତ
ହୋଇବ ଭକତଙ୍କର
ଜୟ ଜଗନ୍ନାଥ ଧ୍ୱନିରେ କମ୍ପିବ
ନୀଳ ଶଇଳ କନ୍ଦର।
ଆଷାଢ ଶୁକଳ ଦ୍ୱିତୀୟା ତିଥିରେ
ହୋଇବ ରଥ ଯାତରା
ଦେବତା ମାନବ ଦାନବ ଗନ୍ଧର୍ବ
ସଭିଙ୍କ ଖୁସି ଆସରା ।
ସ୍ନାନ ଗୁଣ୍ଡିଚା ଏ ନିତ୍ଯଲୀଳା ତାଙ୍କ
ପତିତ ତାରଣ ପାଇଁ
ପ୍ରାସାଦୁ ବାହାରି ରତ୍ନସିଂହାସନୁ
ପ୍ରଭୁ ଆସନ୍ତି ଓହ୍ଲାଇ ।
ଦରଶନେ ତାଙ୍କ ହରଇ ପାତକ
ଆସରେ ଭକତ ଜନ
ରଥରେ ଦେଖିବ ଠାକୁରମାନଙ୍କୁ
ଆସ ଘୋଷଯାତ୍ରା ଦିନ ।