ରଜଗୀତ

ଆସିଛି ରଜ ମଉଜ ଲୋ ବଉଳ

ଆସିଛି ରଜ ମଉଜ,

ବନସ୍ତରେ ଆଉ କିଏ ଡାକିବ ଲୋ

ସପୁରୀ ରେ ମଲା ଗଜ ।

ଉଡ଼ିଗଲା ଗେଣ୍ଡାଳିଆ ଲୋ ବଉଳ

ଉଡ଼ିଗଲା ଗେଣ୍ଡାଳିଆ,

ଦୋଳି ବାନ୍ଧିବାକୁ ଗଛଗୋଟେ ନାହିଁ

କଂକ୍ରିଟ ଜଙ୍ଗଲ ଠିଆ ।

ଲୁଡୁ କଉଡି ର ଖେଳ ଲୋ ବଉଳ

ଲୁଡୁ କଉଡ଼ିର ଖେଳ,

ସାଙ୍ଗ ସାଥୀଙ୍କର ନହୁଏ ମେଳ ଲୋ

ଘଷା ମୋବାଇଲି କାଳ ।

ବିରି ଚାଉଳର ପିଠା ଲୋ ବଉଳ

ବିରି ଚାଉଳର ପିଠା,

ଆଜିକା ଛୁଆଙ୍କୁ ଲାଗୁଛି ପିତା ଲୋ

ପିଜା ବରଗର ମିଠା ।

ଉଡ଼ିଗଲା ସରୁ ବାଲି ଲୋ ବଉଳ

ଉଡ଼ିଗଲା ସରୁ ବାଲି,

ଝିଅ ଯାଇଅଛି ଟିକ ଟକ୍ କରି

ଦୋଳି ପଡ଼ିଅଛି ଖାଲି ।

ଗାଆଁମୁଣ୍ଡେ ବର ଦୋଳି ଲୋ ବଉଳ

ଗାଆଁମୁଣ୍ଡେ ବର ଦୋଳି,

ବାଗୁଡି ନଖେଳି ପୁଅ ଯାଇଛି ଲୋ

କିରିକେଟ ଖେଳ ଖେଳି ।

ଜାମୁକୋଳି ବଡ଼ କଷା ଲୋ ବଉଳ

ଜାମୁକୋଳି ବଡ଼ କଷା,

ଗାଆଁ ଗୋଟାଯାକ ବୁଲି ଆସିଲି ଲୋ

କେହି ଖେଳୁନାହିଁ ପଶା ।

ବୁଡ଼ିଗଲା ପରମ୍ପରା ଲୋ ବଉଳ

ବୁଡ଼ିଗଲା ପରମ୍ପରା,

ପରିବେଶ ଆଜି ହୋଇଲା ଧ୍ୱଂସ ଲୋ

ଉତ୍ତପ୍ତ ହୋଇଲା ଧରା ।