ରୂପବତୀ ମୋ ଘରଣୀ
ରୂପବତୀ ମୋ ଘରଣୀ
ରୂପବତୀ ମୋର ସୁନ୍ଦର ଘରଣୀ
ଘରକୁ ସୁନ୍ଦର ଗଢିଛି
ମାୟା ମୋହ ଜାଲେ ମୋତେ ବାନ୍ଧିଦେଇ
ସଭିଙ୍କୁ ପର କରିଛି l
ଯେବେଠାରୁ ମୋର ହାତ ଧରିଦେଲା
କି କିମିଆ ମୋତେ କଲା
ତାର କଥାରେ ନାଚୁଅଛି ମୁଁହି
ରାତିର ନିଦ ହଜିଲା l
ଭାବିଥିଲି ନାରୀ ଅଟେ ନାରାୟଣୀ
ଦୁଇ କୁଳର ହିତା
ଭାବନା ମୋର ଭୂଲ ହୋଇଗଲା
ମୋତେ କାଟିଦେଲା ଚିତା l
ଯେତେକ ଅର୍ଜିଲି ତାର ହାତେ ଦେଲି
ଉପାୟ ଶୂନ୍ୟ ହେଲି
ପ୍ରତିଦିନ ତାର ମନ ରଖିବାକୁ
ସିନେମା ମଲ ନେଲି l
ଜ୍ୱାଳାମୂଖୀ ମୋର ଘରଣୀ ହୋଇଲା
ମୋର କଥା ମାନିଲାନି
ପ୍ରେମ କରିବାର ଫଳ ମିଳିଗଲା
ସୁଖ ମୁଁ ପାଇଲିନି l
ରାତିଦିନ ଖାଲି ମନଦୁଃଖ କରି
ମୁଣ୍ଡ ମୋର ଚନ୍ଦା ହେଲା
ରୂପକୁ ଦେଖି ବାହା ହେଲି ସିନା
ଦୁଃଖରେ ଜୀବନ ଗଲା l
ପିଲାମାନେ ଆମ ଝଗଡ଼ାକୁ ଦେଖି
ବୁହାଇଲେ ନିତିଲୁହ
କେମିତି ଗଢିବି ସୁଖର ସଂସାର
ମନରେ ଉଠଇ କୋହ l
ମନ୍ଦିରକୁ ଯାଇ ପୂଜା ପାଠ କରି
କେତେ ମାନସିକ କଲି
ଜୀବନ ନାଆରେ ଅଶାନ୍ତି ହୋଇ
ଭାଗ୍ୟକୁ ନିନ୍ଦା କଲି l