ସ୍କୁଲରେ ପ୍ରଥମ ଦିନର ଅନୁଭୂତି

ପିଲାବେଳୁ ଥିଲା ମୋର ପଢିବାର ସଉକ

ଗପ ଆଉ ଗୀତ ପଢା ଲାଗୁଥିଲା କୌତୁକ।

ବୋଉ ଦିନେ କହିଦେଲେ ପୁଅକୁ ନେଇ ଯାଅ

ପାଖ ସ୍କୁଲ ଦେଖି ତାକୁ ଦାଖିଲ ତ କରାଅ।

କେତେ ଆଉ ଘରେ ବସି ଗପ ଗୀତ କରିବ

ସ୍କୁଲ ଗଲେ ସାଙ୍ଗ ମେଳେ ପାଠ ଟିକେ ପଢିବ।

ମୁଣ୍ଡକୁ କୁଣ୍ଡାଇ ମୋର ସଫା ଜାମା ଗଳାଇ

ସ୍କୁଲ ଚାଲ ବାବୁ କହି ମୋତେ ନେଲେ ବଢାଇ।

ରାସ୍ତାରେ ଗୋଟିଏ ସ୍କୁଲ ଦେଖି ବାବା ରହିଲେ

ସେଠାରେ ଶ୍ରେଣୀକୁ ଯାଇ ଅଭିଳାଷ କହିଲେ।

ସେ ଶ୍ରେଣୀରେ ଶଶୀ ମାଷ୍ଟ୍ରେ ସାହିତ୍ୟର ଶିକ୍ଷକ

ସାହିତ୍ୟ ବହି ବଢାଇ ହେଲେ ସେ ନିରୀକ୍ଷକ।

ପାଟିରେ ବାଟୁଳି ମୋର ଲାଗିଲାନି ପଢିଲି

ମୋ ପଢିବା ପ୍ରତିଦାନେ ପ୍ରଶଂସାରେ ବୁଡିଲି।

ଶିକ୍ଷକ ପାଖକୁ ଡାକି କହିଲେ ମୋ ବାପାଙ୍କୁ

ଏହି ଶ୍ରେଣୀ ଷଷ୍ଠ ଅଟେ ନେଇଯାଅ ଏହାକୁ।

ଏହା ମଧ୍ୟ ଇଂରାଜୀ, ଯିବ ଏ ପ୍ରାଥମିକ

ପଢାଅ ଦ୍ବିତୀୟ ଶ୍ରେଣୀ, ଲୋଡାନାହିଁ ୟା ଏକ।

ସ୍କୁଲର ଠିକଣା ସାର ଦେଲେ ବାରେ ବତାଇ

ମନ ହରସରେ ସାଥେ ନେଲେ ବାଟ କଢାଇ।

ଏହିପରି ଭାବେ ମୁହିଁ ପଢିନାହିଁ ପ୍ରଥମ

ଦ୍ବିତୀୟ ଶ୍ରେଣୀରୁ ମୋର ପାଠପଢା ମରମ।