ଆଈ ମୋତେ ଦେଲା ଠାରି
ଆଈ ମୋତେ ଦେଲା ଠାରି
ଥରେ ଯାଇଥିଲି ମାମୁଁ ଘରକୁ ମୁଁ
ମାଆଙ୍କ ସାଥିରେ ବୁଲି ,
ଅନ୍ୟ ମାଉସୀ ଓ ପିଲା ଆସିଥିଲେ
ଦେଖି ଭାରି ଖୁସି ହେଲି ।
ସାଥୀ ହୋଇ କେତେ ଖେଳିଲୁ ,ବୁଲିଲୁ
ଖାଇଲୁ ଏକାଠି ମିଶି ,
କୃଷ୍ଣଚୂଡ଼ା କଢ଼ ଆଙ୍କୁଡ଼ା ଲଢେଇ
କରିଲୁ ଛାଇରେ ବସି ।
ଅଗଣାରେ ଥରେ ଡେଉଁଥିଲି ଏକା
ଆଈ ମୋତେ ଦେଲା ଠାରି ,
କହିଲା ଜଣକୁ ଅଙ୍ଗୁଳି ଦେଖାଇ
"ଇଏ ବଡ଼ ଲୋକ ଭାରି ।
ଅଛି ଗାଡ଼ି, ଘୋଡ଼ା, ମଟର ତାଙ୍କର
ବାହା ହେବୁକି ଲୋ ୟାଙ୍କୁ ,
ଦେଖୁନୁ କେମିତି ଗୋରା ତକ ତକ
ରସିକ ଟିକିଏ ନାଁ-କୁ ।"
ସେ ଲୋକ ବି ମୋତେ ଅନେଇ ହସିଲେ
କହିଲେ-"କହୁନୁ କିଛି ,
ରାଣୀ କରି ତୋତେ ରଖିବି ଲୋ ମୋର-
ଦୁଇତାଲା କୋଠା ଅଛି ।"
ଇଏ କେମିତିକା ଲୋକଟାଏ ଭାବି
ଲାଜରେ ଆସିଲି ଧାଇଁ ,
ମାଆ ପାଶେ ତୁନି ତୁନି କହିଦେଲି
କହୁଥିଲା ଯାହା ଆଈ ।
ସେଇ ଲୋକ କଥା ଶୁଣିଦେଲା ପରେ
ମାଆ ବି ହସିଲା କେତେ ,
କୁହାକୁହି ହୋଇ ଆହୁରି ହସିଲେ
ମାମୁଁ ଓ ମାଉସୀ ଯେତେ ।
କାନ୍ଦୁଣୁ ମାନ୍ଦୁଣୁ ହୋଇଗଲି ମୁହିଁ
ମାଆ କହିଦେଲା ସଫା ,
ହିସାବରେ ତୋର ଅଜା ହେବେ ପରା
ସିଏ ତୋ ମାଇଁଙ୍କ ବାପା !!
ଦାଣ୍ଡ ପାଖୁ ଅଜା ଫେରିଆସି ଆମ
କଥା ଶୁଣୁଥିଲେ ନଇଁ ,
କହିଲେ-"ବକଟେ ଛୁଆ ସିନା ଇଏ
କଥାରେ ଭଳିଲା ନାଇଁ ।"
ଠୋ ଠୋ ହୋଇ ହସିଲେ ସଭିଏଁ
ଲାଜରେ ମୁଁ ଉବୁଟୁବୁ ,
ଅଚିହ୍ନା ଲୋକଟା ମାଇଁଙ୍କର ବାପା
ଦିନ ଗଲା ଭାବୁ ଭାବୁ ।