ରଜଦୋଳି ଗୀତ

    

ଯାଆରେ ରଜଦୋଳି ଉଡ଼ି ଯାଆ l

 ଆମ ପରବର ଗୋଉରବ ଗାଥା 

  ମେଘଦେଶେ କହି ଆଆ ll

ଓଡ଼ିଶା ରାଇଜେ ପରବ ଖ୍ୟାତ ଏ 

   ଶୁଣ ରଜଦୋଳି ଗୀତ l

ନୀଳାଚଳେ ବିଜେ ଜଗତ ସମ୍ରାଟ 

    ମହାପ୍ରଭୁ ଜଗନ୍ନାଥ l

କି କହିବି ତାଙ୍କ କୀରତି ଗାରିମା 

   ଦୋଳି ଟିକେ କହିଆଆ ll

ଯାଆରେ ରଜଦୋଳି.....

କାଳିଆ ବଳିଆ ସେ ନୀଳାଚଳିଆ 

   ବାରମାସେ ତେର ଯାତ l

ଅହଲ୍ୟା ତାରଣ, ମାନ ଉଦ୍ଧାରଣ 

   ନୀଳଚକ୍ରେ ଉଡ଼େ ନେତ l

କି କହିବା ତାଙ୍କ ପୀରତି କରିବା 

  ରଜ ଦୋଳି ଶୁଣି ଥାଆ ll

ଯାଆରେ ରଜଦୋଳି.....

ପରବ ପ୍ରିୟ ମୋ ଓଡ଼ିଆ ଜାତିଟା 

    ପରବ ପ୍ରିୟ ତା ପ୍ରଭୁ l

ଓଡ଼ିଆ ଜାତିର ପରବ ଯେତେକ 

     ସୃଜିଛନ୍ତି ମହାପ୍ରଭୁ l

ଆରିସା ଗଇଁଠା ମଣ୍ଡା ପୋଡ଼ପିଠା 

 ମେଘ ଦେଶେ ନେଇଯାଆ ll 

ଯାଆରେ ରଜଦୋଳି.....

ଉତ୍କର୍ଷ କଳାର ଦେଶ ମୋ ଉତ୍କଳ 

    ଜଗତେ ପଡ଼ିଛି ଡାକ l

ଧରମା ବିଶିଆ କାଳେ ଗଢ଼ିଥିଲେ 

   ଉତ୍କର୍ଷ କଳା କୋଣାର୍କ l

ଲିଙ୍ଗରାଜ ରାଜାରାଣୀଙ୍କ କାହାଣୀ 

   ବାରିଦେ ଶୁଣାଇ ଆଆ ll

ଯାଆରେ ରଜଦୋଳି.....

ମୋ ରଜ ପରବ ଭୂମି ପୂଜାହେବ 

   କୃଷକେ ଆନନ୍ଦ ଭାରି l

ବଡ଼ ହଳିଆ ମୋ ନୀଳାଚଳେ ବସି 

    ହସୁଛନ୍ତି କିରି କିରି l

ବନ୍ଦେ ଶ୍ରୀମୂଷଳୀ ହଳାୟୁଧ ହଳୀ 

    ବନ୍ଦଇ ଉତ୍କଳ ମାଆ ll 

ଯାଆରେ ରଜଦୋଳି ଉଡ଼ି ଯାଆ 

ଆମ ପରବର ଗୋଉରଵ ଗାଥା 

  ମେଘଦେଶେ କହିଆଆ ll