ରଜ ସଜବାଜ

କିଏ କେଉଁ ମତେ ରଜକୁ ପାଳିବେ,

କିପରି କାହା ମଉଜ ।

ପ୍ରତିବର୍ଷ ପରି ଏ ବର୍ଷ ପାଇଁ ବି,

ହେଲିଣି ମୁଁ ସଜବାଜ ।।

ଘରଣୀ ମୋହର ପନ୍ଦର ଦିନରୁ,

ଦେଲେଣି ବରାଦ ମୋତେ ।

ରଜ ତିନି ଦିନ କରିବାକୁ କାମ,

ତାଲିକା ଯାହାକୁ ଯେତେ ।।

ଭୋର ଚାରିଟାରୁ ଉଠିବ ସ୍ୱାମୀ ହେ,

ରାତି ଦଶରେ ଶୋଇବ ।

ବଜାର ପାଇଁକି ବାହାରକୁ ଯିବ,

ବାକି ଘରେ ତୁମେ ଥିବ ।।

ସକାଳ ପାଇଟି ରନ୍ଧାବଢ଼ା ସାଥେ,

ବାସନ ମାଜିବି ମୁହିଁ ।

ଘର ଝାଡ଼ୁ ପୋଛା କରିବାକୁ ହେବ,

ପାରିବିନି ଆଉ ଶୋଇ ।।

ଦୋଳିଟିଏ ଦେବି ଅଗଣାରେ ଖଞ୍ଜି,

ଖିଲି ପାନ ଆଣୁଥିବି ।

ଘର କରଣାର ଯାବତୀୟ କାମ,

ଦିନଯାକ କରୁଥିବି ।।

ସବୁବର୍ଷ ପରି ଏହି ସଜବାଜ,

ମୋର ଏ ଚିରାଚରିତ ।

ସୁଖରେ ସୁଖରେ ରଜପର୍ବ ହେବ,

ରଖି ମୋ ମାନ ମହତ ।।