ରଜ ନାଗରା
ରଜ ନାଗରା
ପ୍ରବଳ ଗ୍ରୀଷମ ଭାଇ ବଇଶାଖ ଖରା l
ଡିବି ଡିବି ଡିବି ଡିବି ବାଜିଲା ନାଗରା ll
ଡେଙ୍ଗୁରା ବାଜୁଛି ପାଞ୍ଚ ଗ୍ରାମେ ଗିଡ଼ିଗିଡ଼ି l
ରଜ ମଉଜ ହୋଇବ ଖେଳିବା ବାଗୁଡ଼ି ll
ବାଜି ରଖା ଅଛି ଏକ ହେଏଁ ବଡ଼ ଖାସି l
ଜିତା ପଟ ଦଳ ନେଇଯିବ ହୋଇ ଖୁସି ll
ହଗୁରି, କାହ୍ନୁଆ, ମୂଷା ,ମଧୁ ଓ ଧଡ଼ିଆ l
ଟୋକା ସବୁ ଆସିଗଲେ କଇଥ ପଡ଼ିଆ ll
ରଙ୍ଗସ,ପଥର ପଡ଼ା ଦୁଇ ଗୋଟି ଦଳ l
ଦୁଇ ଦଳ ମଧ୍ୟେ ଧୀରେ ଜମିଗଲା ଖେଳ ll
ବାଗୁଡୁ ଗୁଡ଼ୁ,ବାଗୁଡୁ ଗୁଡ଼ୁ, ବାଗୁଡୁ ଗୁଡ଼ୁ l
ବାହାଘର ଦିନ ଜାଇ ରଗୁଡୁ, ଜାଇ ରଗୁଡୁ ll
ବାଗୁଡ଼ୁ ବାଗୁଡ଼ୁ ବାଇଁ ଚିରା, ବାଇଁ ଚିରା l
ବାଇଁ ଚିରା ଭାଇ କଳା ଜୀରା, କଳା ଜୀରା ll
କଳା ଜୀରା ଭାଇ ରାଆଗେନା ରାଆଗେନା l
ହାଣ୍ଡି କୁଣ୍ଢେଇ ଭାଆଙ୍ଗେନା ଭାଆଙ୍ଗେନା ll
ନାଗରା ବାଜୁଛି ଯେହ୍ନେ ରଣେ ବୀରବାଦ୍ୟ l
ଖେଳ ଚାଲି ଅଛି ଯଥା କୁରୁକ୍ଷେତ୍ର ଯୁଦ୍ଧ ll
ପଥର ପଡ଼ା ହଗୁରି ରଙ୍ଗସର ମୂଷା l
ଗଡ଼ାପଡ଼ା ଲାଗିଥାନ୍ତି ଯେହ୍ନେ ଭୀମ ଦୁଃଶା ll
ଖେଳ ଜମିଥିଲା ମଧୁ ଲୁଙ୍ଗି ଖୋଲିଗଲା l
ଚଡି ପିନ୍ଧି ଥିବାରୁ ତା ଇଜ୍ଜତ ବଞ୍ଚିଲା ll
ଛକା ପଞ୍ଝା ଖେଳ ଶେଷେ ନାଗରା କହିଲା l
ପଥର ପଡ଼ା ଜିତିଲା ବାଜି ଖାସି ନେଲା ll
ସଞ୍ଜବେଳେ ଟୋକାମାନେ ସବୁ ମିଳିମିଶି l
ଭୋଜିଟିଏ କଲେ କାଟି ଜିତା ପଟ ଖାସି ll
ରୋଷେଇ ଚାଲିଛି ସବୁ ମିଶିଗଲେ ସାଙ୍ଗ l
ବାଟିକରି ପକାଇଲେ ଟେଳେ ଟେଳେ ଭାଙ୍ଗ ll
ଟହଲିଆ ମୋତେ କଲେ ଦୁର୍ବଳିଆ ଦେଖି l
ତିନି ଦିନ ଶୋଇଲି ମୁଁ ଭାଙ୍ଗ ଟେଳେ ଚାଖି ll