ରହସ୍ୟ

ରାମାୟଣ ହେଉ  ଅବା ମହାଭାରତ

     ରହସ୍ୟ ଲୁଚି ରହିଛି,

ଶକୁନିର ପଶା    ମନ୍ଥରା ମନ୍ତ୍ରଣା

      ସର୍ବନାଶ କରିଅଛି ।

ଶ୍ରୀକୃଷ୍ଣଙ୍କ ଚକ୍ର   ବେଳାଲ ଦେଖିଛି

    ଗୋଟି ଗୋଟି ମୁଣ୍ଡ କାଟେ,

ଭୀଷ୍ମଙ୍କ ପ୍ରତିଜ୍ଞା   ଭୀମର ଶପଥ

     ସତ୍ୟ ହୁଏ ରାଜ ଥାଟେ ।

ଚକୋର ରହସ୍ୟ  ଚକୋରୀ ଜାଣଇ

    ଦୋଷୀ ହୋଇଥାଏ ନିଶି,

ପଦ୍ମର ରହସ୍ୟ    ସୂରୁଜ ଜାଣଇ

     ଦୁଃଖରେ ଦିଅନ୍ତି ହସି ।

ଚିଲିକାର ମାଛ    ଆକାଶର କୟାଁ

     ଅସମ୍ଭବ ନୁହେଁ କିଛି,

ରହସ୍ୟ ଭିତରେ    ସମାଧାନ ଅଛି

     ମିଥ୍ୟାରେ ନର ଖୋଜୁଛି ।

ଚକୁଳି ମଧ୍ୟରୁ    ବିନ୍ଧ ଗଣୁ ଗଣୁ

    ଦିନ ବିତିଯାଏ ତା'ର,

ସ୍ବାର୍ଥ ଅହଂକାରେ   ଘୁରି ବୁଲୁଥାଏ

      ନ ମିଳଇ ତା ଉତ୍ତର ।

ଚୋରା ଚାହାଣିର   ଗୁପତ ରହସ୍ୟ

      ଚୋରା ପୀରତିକୁ ଜଣା,

ମିଛଟାରେ ଖାଲି    ବାଉଳି ହୁଅଇ

      ଜାଣି ହୁଅଇ ଅଜଣା ।

ବୈଜ୍ଞାନିକ ଜାଣେ   ପ୍ରତିକ୍ରିୟା କ'ଣ

     ରାସାୟନିକରେ ଅଛି,

ଗୁପତ ରହସ୍ୟ    ଉନ୍ମୋଚନ କରି

      ଚନ୍ଦ୍ରାଲୋକେ ପହଞ୍ଚିଛି ।

ଖୋସାମଦକାରୀ  ଭଲ ଭାବେ ଜାଣେ

     କଥାଟିକୁ ଖଞ୍ଜି କହେ,

ଚାତୁର୍ଯ୍ୟ ସହିତ   ଚାଦର ଘୋଡାଏ

     ବିଷ ଭରି କଥା କୁହେ ।

ପାପୀର ରହସ୍ୟ   ହୋଇଥାଏ ଶେଷ

     ପାପ ଭାରା ବଢିଗଲେ,

ବୁଲା କୁତି ଠାରୁ   ହୀନ ହୋଇଯାଏ

     ଯେତେ ଧନ ଅରଜିଲେ ।

ରହସ୍ୟକୁ ଭେଦ   କରିବାର ବାଟ

     ଅଭିଜ୍ଞ ପୁରୁଷ ଜାଣେ,

ରହସ୍ୟ ଭିତର    ଗୁପ୍ତ ତଥ୍ୟଟିକୁ

     ଲୋକଲୋଚନକୁ ଆଣେ।