ରାତିର ରାସ୍ତାରେ
ରାତିର ରାସ୍ତାରେ
ରାତିର ଅନ୍ଧାରରେ ଜ୍ୟୋସ୍ନା ଚେକି ଚେକି ହେଇ ପଡ଼ିଛି ,
କାହାର ଋତୁସ୍ରାବ ପରି !
ସେପାଖ ଟିଣଘର ପାଖରେ କୁକୁର ଭୁକୁଛି ,
ପାଖ ଘରେ ଲାଇଟ୍ ଜଳୁଛି ।
ହସୁଥିବା ଯୋଡେ ମୁହଁ ଖୁବ୍ ଜୋରରେ ଲାଗିଆସୁଛି !
ମୁଁ ଜାଣେ ସିଗାରେଟର ଧୂଆଁ ଆଉ ଅନ୍ଧାର ଭିତରେ କିଛି ଫରକ ନାହିଁ ।
ସେ କହିଦେଲା ପରି ,
ଆୟୁଷ ସରିଆସୁଛି ।
ତୁମେ ଆସିଥିଲ କି ସେଇ ରାସ୍ତା ଦେଇ ?
ଯେଉଁଠି ରାତି ସରିଯାଏ !
କଳା କଳା ଭବିତବ୍ୟ ଅତୀତ ପାଲଟେ -
ଗୋଟେ ଶୀତୁଆ ରାତ୍ରରେ ,
କ'ଣ ଥାଏ ଯେ ସେ କଳା ମଚମଚ ପିଚୁ ରାସ୍ତାରେ ?
ମୋ କଥା କିଛି କହିଥିଲ କି ?
ପଚାରିଥିଲ କି କାହାକୁ ?
ଖୋଜିଥିଲ କି ମୋ ନିର୍ଘୋଷିତ ଠିକଣାକୁ ?
ଖୋଜିଥିବ ଯଦି ଜଣା ପଡିନଥିବ ସେ କଳା ମଚମଚ ରାସ୍ତା !
ମୋ କଥା ପଚାରୁଛ !
ରାସ୍ତାରେ ଆସିଲା ବେଳେ ଦେଖିନ ,
ଠା କୁ ଠା ପଡ଼ିଛି ଛାପ ,
କାହାର ରକ୍ତ ପରି !
ଜଣାଉଛି ଯେ ଜୀବନ ମଧ୍ୟେ ଜାତନା ଅଛି ,
ସେତିକି କ'ଣ ଯଥେଷ୍ଟ ନୁହେଁ ?
ବଞ୍ଚିବାର ଗୋଟେ ଅଘୋଷିତ ଦଲିଲ୍ ରେ !