ରାକ୍ଷୀ

ଭାବରେ ବନ୍ଧା ଭାଇ ଭଉଣୀ

ଜାଣିଛ କିଏ କହ

କେତେ ସେନେହ ତାଙ୍କ ଭିତରେ

ରହିଛି ଦେଖି ନିଅ ।

ବରଷକରେ ରାକ୍ଷୀ ପୁନେଇଁ

ଆସଇ ଥରଟିଏ

ଭାଇ ହାତରେ ବାନ୍ଧିବ ରାକ୍ଷୀ

ଭଉଣୀ ଚାହିଁଥାଏ ।

ଆସଇ ଯେବେ ସେହି ଦିନଟି

ମନଟି ତାର ଖୁସି

ଭାଇ ହାତରେ ରାକ୍ଷୀ ବାନ୍ଧି ସେ

ଦିଅଇ ଟିକେ ହସି ।

ରେଶମୀ ରାକ୍ଷୀ ରହିଛି ସାକ୍ଷୀ

ଭାବର ସୂତା ଖିଅ

ଭାଇ ଭଉଣୀ ସେନେହ ପ୍ରୀତି

ଦେଖିଛି ଅହରହ ।

ଭାଇଟି ତାର ସୁରକ୍ଷା ଦେବ

ବିପଦ ଆପଦରେ

ମନାସେ ଶୁଭ ଭାଇଟି ତାର

ଥାଉ ସର୍ବ ଶୁଭରେ ।

ରକ୍ଷା ବନ୍ଧନ ଉତ୍ସବ ଆମ

ପବିତ୍ର ସମ୍ପର୍କର

ସାକ୍ଷୀ ରହିଛି ସଦା ସର୍ବଦା

ଆମ ପରମ୍ପରାର ।

ଶୁଭ ଲଗନେ ରାକ୍ଷୀଟି ବାନ୍ଧେ

ଭଉଣୀ ଭାଇ ହାତେ

ଜଗନ୍ନାଥଙ୍କ କରୁଣା କଣା

ମନାସେ ତାହା ସାଥେ ।