ରାଜଦଣ୍ଡ

ମହାଭାରତରେ ରାଜ୍ଯ ସୁଶାସନ

ପ୍ରମୁଖ ପଦବୀ ରାଜା

ଚୋଳ ଗୁପ୍ତ ମୌର୍ଯ୍ଯ ରାଜତ୍ବ କାଳରେ

ସ୍ବତନ୍ତ୍ର ବିଧାନ ଖଞ୍ଜା ।

ନିର୍ବାଚନ ଅବା ଚୟନର ପରେ

ହୁଅଇ ରାଜ୍ୟାଭିଷେକ

ପିନ୍ଧନ୍ତି ଶିରପା ସୁବର୍ଣ୍ଣ କିରୀଟ 

କପାଳେ ଟୀକା ତିଳକ ।

ଧାରଣ କରନ୍ତି ସ୍ବର୍ଣ୍ଣ ରାଜଦଣ୍ଡ 

ଉଡେ ଛତ୍ର ବୈଜୟନ୍ତୀ

ପ୍ରଜାନୁରଞ୍ଜକ ରାଜନ ସାକ୍ଷାତ

ଈଶ୍ବରଙ୍କ ପ୍ରତିନିଧି ।

ରହି ଅବିଚଳ ଦୃଢ ସ୍ଥିତପ୍ରଜ୍ଞ 

ସଭାସଦ ଉପଦେଶେ

ନୀତି ଅନୁସାରେ କରନ୍ତି ଶାସନ

ବିଚ୍ଯୁତ ନହୋନ୍ତି ଲେଶେ ।

ରାଜା ସ୍ବାଭିମାନ ସୌଭାଗ୍ଯ ଦାୟକ

ରହି ସ୍ବଚ୍ଛ ଶୂଚିବନ୍ତ

ଉଚ୍ଚ ସିଂହାସନେ ହୁଅନ୍ତି ଆସୀନ

ପ୍ରତୀକ ମର୍ଯ୍ୟାଦାବନ୍ତ ।

ରାଜ ପୁରୋହିତ ଗୁଣୀଜ୍ଞାନୀ ଜନ

ଗଣ୍ଯମାନ୍ଯ ପାରିଷଦ

ଅଭିଷେକ ପର୍ବେ ଜଣାନ୍ତି ରାଜନେ

ସୁବିଶ୍ବାସ ସହମତ ।

ଧରି ରାଜଦଣ୍ଡ ଈଶ୍ବରଙ୍କ ନାମେ

ନିଅନ୍ତି ରାଜା ଶପଥ

ପାଳିବେ ନିଷ୍ଠାରେ ସର୍ବୋପରି ନ୍ଯାୟ

ଜୀବନରେ ଧର୍ମ ସତ୍ଯ ।

ବହି ଅହଙ୍କାର ଆଳସ୍ୟ ବିଳାସେ

ରାଜନ ହୋଇ ପ୍ରମତ୍ତ 

କଲେ ଅବହେଳା ସ୍ବକର୍ତ୍ତବ୍ଯ ଧର୍ମେ

ଭୋଗିବେ ଦଣ୍ଡ ଅବଶ୍ୟ ।

ରୁଷ୍ଟ ହେବେ ସ୍ବୟଂ ମହାଦେବ ଶିବ

ଧରି ରୁଦ୍ର ଅବତାର

ରଚିବେ ବିନାଶ ଅତି ଭୟଙ୍କର 

ନାଶିବେ ପାପ ତିମିର ।