ରାଜବେଶ

ମୃଦୁ ମଳୟର ମୃଦୁ ବାସ୍ନା ନେଇ

    ଧୀରେ ବସନ୍ତ ଆସଇ

ରଙ୍ଗ ଭରା ବେଶେ ଭାବ ଭକ୍ତି ରସେ 

    ବୁଲନ୍ତି ଜଗତସାଇଁ

ମିତ ଲୋ, ଆଶିଷ ବାଣ୍ଟିବା ପାଇଁ l0l

ପୁନେଇଁ ଫଗୁଣେ ରତ୍ନ ସିଂହାସନେ

    ରାଜ ବେଶେ ଜନାର୍ଦ୍ଧନ

ପିନ୍ଧି ଅଳଙ୍କାର ବୈଡୁର୍ଯ୍ୟ, ଵିଭାବ

    ଝଟକୁଛି ସିଂହାସନ

ଦର୍ଶନେ କଳ୍ମଷ କ୍ଷଣେ ହୁଏ ଦୂର

    ସାତ ଜନମର ପାଇଁ

ମିତ ଲୋ, ଥରେ ଦେଖି ଆସ ଯାଇ l1l

ଶୁକ୍ଳ ଦଶମିରୁ ଚତୁର୍ଦଶୀ ତିଥି

    ଚାଚେରୀ ବେଶେ ଗୋବିନ୍ଦ

ଫଗୁ ରଙ୍ଗ ରସେ ଦୁଆରେ ଦୁଆରେ

   ବୁଲନ୍ତି ଦୋଳ ଗୋବିନ୍ଦ

ଖଜା ସାକରର ଭୋଗର ଆଦର

   ହୁଏ ଭକତଙ୍କ ପାଇଁ

ମିତ ଲୋ, ଦୋଳେ ଦେଖ ଭାବଗ୍ରାହୀ l2l