ପୁଂଜିର ଶୃଂଖଳକୁ ଛିଣ୍ଡାଇବା

ପରିସ୍ଥିତି ଆଜି ହୋଇଛି ଜଟିଳ, ଏକତା

ଅଭାବେ ଶ୍ରମିକ ହୁଏ ବାଟବଣା,

ଭଙ୍ଗା ହୃଦୟରେ ପ୍ରଶ୍ନ କରୁଛି, ସେ ପ୍ରଶ୍ନ

ଦେଉଛି ବହୁ ଅବ୍ୟକ୍ତ ଯନ୍ତ୍ରଣା l

ପ୍ରତୀକ୍ଷା କରିଛି ବର୍ଷ ବର୍ଷ ଧରି ଆଖିରେ

ଆଖିଏ ସ୍ଵପ୍ନ ନେଇ

ଅସୀମ ଧୈର୍ଯ୍ୟ ସହିତ ଶୋଷିତ ମଣିଷ

ମୁକ୍ତିର ତୃଷ୍ଣା ଥାଇ  l

ସମାଜର ଅବହେଳିତ ମଣିଷ, ମଣିଷ ଭଳି

ବଂଚିବା ପାଇଁ ଦେଖଇ ସପନ

ପୁଂଜିବାଦର ଶୃଂଖଳକୁ ଛିଣ୍ଡାଇ ମୁକ୍ତ ଆକାଶେ

ଡେଣା ମେଲି ଉଡ଼ିବାକୁ ମନ   l

ଆଦର୍ଶ ସମାଜ ପ୍ରତିଷ୍ଠା ନିମନ୍ତେ ମାନଵର

ଚରିତ୍ର ଗଠନ ଦରକାର

ଲୋକଙ୍କୁ ଉତ୍ତମ ଶିକ୍ଷା ଦାନ ପାଇଁ ଆନ୍ତରିକତା

ରହିବା ଉଚିତ ସରକାରଙ୍କର l

ଦିନେ ନା ଦିନେ ନିଶ୍ଚେ ଅବଶ୍ୟ ଆସିବ ନୂତନ

ପଞ୍ଜୀକା ନୂଆ ବରଷରେ

ପୁରୁଣା ପାଞ୍ଜିର ହୋଇଣ ଶେଷ ଉନ୍ମୋଚିତ ହେବ,

ଆସିବ ହସ ନିଷ୍ପେଷିତ ମନରେ l

ସଚେତନତା ଆଣିବାକୁ ତେଜି ବିଳାସ ବ୍ୟସନ

ଜୀବନ ଯୌବନକୁ ପଡିବ ତୁଚ୍ଛ ମଣିବାକୁ

ସମାନତାର ସେତୁବନ୍ଧ କାର୍ଯ୍ୟରେ ଗୁଣ୍ଡୁଚି ମୂଷା

ପରି ସମାଜ କଲ୍ୟାଣେ ଯୋଗାଇବା ସହଯୋଗକୁ l