ପଟା ଦୋଳିରେ ଝୁଲଇ ରାଧା

ଦୋଳି ଉଡଇ ମେଘ ରାଇଜ

ଫୁଲ ଅଗଣା କୁଆଁରୀ ଲାଜ

ତୋଟା ଗହଳେ ରଙ୍ଗ ମୁରୁଜ

ଘୋର ବନସ୍ତେ ଡାକଇ ଗଜ

ସେତ ଆସିଛି ଆସିଛି ଆସିଛି ରଜ...

ମୁହଁ ଅନ୍ଧାର ଭାରି ସୁନ୍ଦର

ଭରା ଗାଧୁଆ ତୁଠରେ

ଚନ୍ଦନ ଚିତା ସରୁ ଅଳତା

ମହକେ ବାଟଘାଟରେ

ଗଛ ମୂଳରେ ଭାରି ଗହଳି

ଗଛ ଡାଳରେ ଝୁଲେ ବାଉଁଶ ଦୋଳି

ତାଆସ ପାଲି କବାଡି ଖେଳ

ବୁଲାବୁଲି ସେ କେତେ ମଉଜ

ସେତ ଆସିଛି ଆସିଛି ଆସିଛି ରଜ...

ଆମ୍ବ ପଣସ ସପୁରୀ ସଜ

ସବୁ ଘର ମହକଇ

ପୋଡ଼ ପିଠାର ସୁଆଦ ମିଠା

ସବୁ ମନ ନିଏ ମୋହି

ଖିଆ ପିଆରେ ଘର ଉଛୁଳେ

ମନଝୁମେ ନାଚ ଗୀତ ତାଳେତାଳେ

ନୂଆ ବୋହୁ ର ଆସଇ ଭାର

ବଉଦ ପାରେ ଫୁଲର ଶେଜ

ସେତ ଆସିଛି ଆସିଛି ଆସିଛି ରଜ...

ପଟା ଦୋଳି ରେ ଝୁଲଇ ରାଧା

କହ୍ନେଇ ର ବାଟ ଚାହିଁ

ତା ପାଇଁ ରଜ ପାନ ଭାଙ୍ଗିଛି

ପ୍ରିତିର ମସଲା ଦେଇ

ପାନ କହିବ ତା ମନ କଥା

ମନ ଗହନର ସେ ଅକୁହା ବ୍ୟଥା

କହ୍ନେଇ ବିନା କିଏ ବୁଝିବ

ରାଧିକା ରାଣୀ ମନ ଦରଜ

ସେତ ଆସିଛି ଆସିଛି ଆସିଛି ରଜ...