Library
Profile
ପରୁଡ଼ି ମସିଣା ସାକ୍ଷୀ
ପରୁଡ଼ି ମସିଣା ସାକ୍ଷୀ
ଏବେବି ସାଇତା ମୋ ଦୋଳ ମୁକୁଟ
ପରୁଡ଼ି ମସିଣା ସାକ୍ଷୀ
ବାହା ପାଞ୍ଚି ମୋର ଏବେବି ଝଟକେ
ଯାଏ ଆଖି ଦୁଇ ଲାଖି
ଗଇଁଠାଳେ ଏବେ ବନ୍ଧାହୋଇଅଛି
ଆଉ ଦୁଇବାଜି ରଖି
ଏବେବି ସାଇତା ମୋ ଦୋଳ ମୁକୁଟ
ପରୁଡ଼ି ମସିଣା ସାକ୍ଷୀ ।
ସାତ ଦୀପ ମୋର ଜଳେ ଦିକିଦିକି
ଶିଉଲି ତାଟିଆ ଏଇ
ଲାଜ୍ଜା ଖଈ କୁଲା ସେମିତି ରହିଛି
ଜଳୁଛି ତୁମର ଜୁଇ
ତାଟ ଲଗ୍ନ ମୁଦି ଖଣ୍ଡୁଆ ପାଟଟା
ଦେହେ ମୋର ଯାକିଯୁକି
ଏବେବି ସାଇତା ମୋ ଦୋଳ ମୁକୁଟ
ପରୁଡ଼ି ମସିଣା ସାକ୍ଷୀ ।
ମଙ୍ଗନ ହାଣ୍ଡି ମୋ ଏବେବି ବସିଛି
ବସିଛି ସାତ କଳସ
ଲବଣ ଚାମର ପଡୁଛି ବେଦିରେ
ଛାଡିଗଲ ମୋର ପାଶ
ପଞ୍ଚୁଗ୍ରାସୀ ଥାଳି ଆରସା କାକରା
ଛାଡିଗଲ ପ୍ରାଣ ପକ୍ଷୀ
ଏବେବି ସାଇତା ମୋ ଦୋଳ ମୁକୁଟ
ପରୁଡ଼ି ମସିଣା ସାକ୍ଷୀ ।
ବନ୍ଦାଣ ଥାଳି ଟା ଅନେଇ ବସିଛି
ସମୁଦୀ ସମ୍ବନ୍ଧ ହେବ
ବାଜେ ସାହାନାଇ ତୁହାଇ ତୁହାଇ
ମଙ୍ଗୁଳା କୁଆଡେ ଯିବ
ଆଉ ଗୋଟେ ବର ମୋ ପାଇଁ ଆସୁଛି
ଧିକ ମୁଁଯେ ନିରିମାଖି
ଏବେବି ସାଇତା ମୋ ଦୋଳ ମୁକୁଟ
ପରୁଡ଼ି ମସିଣା ସାକ୍ଷୀ ।
ଜଳିଯାଉ ମୋର ବେଦୀର ହୋମରେ
ତୁମେ ତ ରହିଲ ନାଇଁ
ଯାର ହାତ ଧରି ଆନ ଘର ଯିବି
ଧିକାର ଶୁଣିବା ପାଇଁ
ନେଇ ଯାଅ ମୋତେ ଦଶ ଦିଗପାଳ
କେତୋଟି ମୁହୂର୍ତ୍ତ ବାକି
ଏବେବି ସାଇତା ମୋ ଦୋଳ ମୁକୁଟ
ପରୁଡ଼ି ମସିଣା ସାକ୍ଷୀ ।
