ପ୍ରତୀକ୍ଷାରେ*********

ଅନୁଢ଼ା କିଶୋରୀ ମନ ପ୍ରୀତିପର୍ଣ୍ଣା ସାଜି

ଅବ୍ୟକ୍ତ ଭାବନା କୂଳେ ଯାଇଅଛି ମଜ୍ଜି

ଅଜଣା ଆବେଗେ ହୃଦେ ଶିହରଣ ଖେଳି

କାହାପାଇଁ ପ୍ରତୀକ୍ଷାରେ ହେଉଅଛି ଭାଳି ।

ଶୂନ୍ୟତାରେ ଭିଜେ ହୃଦ ନିଃସଙ୍ଗ ଜୀବନ

ବିରହର ଗୀତ ଗାଏ  ଅସ୍ଥିର ଯୌବନ

ବ୍ୟାକୁଳ ପରାଣ ଖୋଜେ କାହାର ଆତିଥ୍ୟ

ବିଶ୍ୱାସର ହାତଧରି ଚାଲିବାକୁ ପଥ ।

ଋତୁ ପରେ ଋତୁ ବୋଳେ ଭିନ୍ନ ଅନୁଭୂତି

କାମନାର ଛବି ଆଙ୍କେ ପଲକରେ ପ୍ରୀତି

ସ୍ୱପ୍ନ ସୁଖେ ସ୍ମିତହାସ୍ୟ ଓଠଧାରେ ମାଖି

ପ୍ରୀତିସ୍ପର୍ଶ ଅବଶୋଷ ଲୁହ ଭରା ଆଖି ।

ପ୍ରୀତି ଦହନରେ ଦଗ୍ଧ ରୂପସୀ ମରମ

କିଏ ସିଏ ଯାଦୁଗର ସାଜିବେ ମଲମ ।