ପରିଚୟ
ପରିଚୟ
ଜୁଇ କି ବୁଝଇ
ଦହନର ଜ୍ୱାଳା
ଦଗ୍ଧ ସିନା କରିପାରେ ।
ମୁଠାଏ ପାଉଁଶ
ମଶାଣି ଭୂଇଁର
ପରିଚୟ ଦେଇପାରେ l
ନିଦାଘ କି ବୁଝେ
ଝାଞ୍ଜିର ପ୍ରକୋପ
ଜାଳିପାରେ ତନୁମନ ।
ତପ୍ତ ହୃଦୟରେ
ରଚି ଦେଇପାରେ
ଯନ୍ତ୍ରଣାର ଅଭିଧାନ l
ମଶାଣି କି ବୁଝେ
ସମ୍ପର୍କର ମୂଲ୍ୟ
ହଜିଯାଏ କେତେ ପ୍ରେମ ।
ଦହନ ତା ଧର୍ମ
ଆନ ପ୍ରହସନ
ଜୀବନର ଶେଷ ଧାମ l
ସାଗର କି ବୁଝେ
ବେଳାଭୂମି ମନ
ବାଲିଘର ଦିଏ ଭାଙ୍ଗି ।
ପ୍ରତାରଣା ଛଳେ
ବାନ୍ଧେ ପ୍ରୀତି ଡୋରେ
ଶ୍ରଦ୍ଧା କୁସୁମରେ ଛନ୍ଦି l
ଗୁମ୍ଫା କି ବୁଝଇ
ଶିଳାଲିପି ଆତ୍ମା
ତା ଦେହର କ୍ଳେଶ କେତେ ।
ପ୍ରତିଷ୍ଠିତ ହୁଏ
ସେହି ପରିଚୟେ
ଖୋଦିତ ଭାଷାର ମତେ l
ପାହାଡ଼ କି ବୁଝେ
ନିର୍ଝରିଣୀ ବ୍ୟଥା
କେତେ କ୍ଳେଶ ପଥେ ତାର ।
ବନ୍ଧୁର ମାର୍ଗରେ
କ୍ଷତାକ୍ତ ହୁଅଇ
ଅସହ୍ୟ କାହାଣୀ ଯାର ।