ପୃଥିବୀ ଠାରୁ ବଡ କିଏ ?

ପୃଥିବୀ ଠାରୁ ବିରାଟ ଯିଏ

     ଧରିଛି ଆମକୁ କୋଳେ,

ଛୋଟରୁ ବଡ କରିଛି ସିଏ

     ତାହାରି ଉଲ୍ଲାସ ଭୋଳେ l(1)

ଲାଳନପାଳନ କରୁଛି ଯିଏ

       ତାହାରି କ୍ଷୀର ପିଆଇ,

ଚାଲି ଶିଖାଏ ଯେ ହାତ ଧରି

       ଗାଲକୁ ଚୁମ୍ବନ ଦେଇ l (2)

କାନ୍ଦିଲା ବେଳେ ଦିଏ ତୁନେଇ

       ହାତରେ ଦିଏ ଖୁଆଇ,

ରୋଗ ହୋଇଲେ ରାତିରେ ସିଏ

       ଉଜାଗରେ ଥାଏ ରହି l (3)

କାଖରେ ଧରି ସିଏ ଆମକୁ

       ଜହ୍ନମାମୁଁଙ୍କୁ ଦେଖାଏ,

ଅଝଟ ହେଲେ କୋଳକୁ ନେଇ

      ନାନା ବାୟା ଗପ କହେ (4)

ଶୁଆଇ ଦିଏ ନେଇ ପଲଙ୍କେ

      ପେଟକୁ ସେ ଥାପୁଡାଇ,

ଶୋଇ ପଡରେ ମୋ ଧନମାଳୀ

      ବାୟା ତୋତେ ଯିବ ନେଇ l (4)

କିଏ ଜାଣିଛ ତାର ନାମଟି

      ତା' ବିନା କେ ସାହା ନାହିଁ,

ସିଏ ଆମର ଅତି ନିଜର

      ସବୁଠାରୁ ବଡ ସେହି l (5)