ପ୍ରଶ୍ନବାଚୀ

ଆପଣଙ୍କୁ ଆପଣମାନଙ୍କୁ

ପାଞ୍ଚଟି ପ୍ରଶ୍ନ ମୋର

ଉତ୍ତର ଦେବେ 

ମହୋଦୟ ସମୀପେଷୁ

ରହିବେନି ନିରୁତ୍ତର ।

ଥକିଲିଣି ଥକି ଗଲିଣି

ଖୋଜି ଖାଜି 

ତର୍କ ବିତର୍କ ପରେ ବି

କପାଳ ପୋଛି ପାଛି

ବସିଛି ଆଉଜି ।

ଘାଣ୍ଟି ଦରାଣ୍ଡି

ବହି ପୋଥି ପଢି ସାରିବା ପରେ ବି

ଅଣ୍ଡାଳି ଉଣ୍ଡାଳି

ମୁଣ୍ଡ ବିନ୍ଧି ପରାସ୍ତ ହେଲା ପରେ ବି 

ଅନ୍ଧୁଣି ବସେଇଛି

ଧରିବି ବାଳିଆ କରାଣ୍ଡି ।

ପ୍ରଶ୍ନବାଣ ଆଜି ବି ପ୍ରଶ୍ନବାଚୀ

କରବଦ୍ଧ ଅନୁରୋଧ

ରହିଲା ରାଣ

ନିରାଶା କରିବେନି ଭାଷା ଦଧିଚି

ଅଭିଲାଷା ହେଉ ପୂରଣ

ସମର୍ଥ ଉବାଚୀ  ।

ମେଘ ବରଷିଲେ 

ଛତା ଖୋଜା ପଡ଼େ

ଆଖି ବରଷିଲେ 

କ'ଣ କରାଯାଇ ପାରିବ ?

ଘରପୋଡି ପାଇଁ 

ଏଲଆଇସି ବୀମା ଲୋଡ଼ା ପଡ଼େ 

ସ୍ୱପ୍ନ ଜଳି ପୋଡି ପାଉଁଶ ହୋଇଗଲେ

 କ'ଣ କରାଯାଇ ପାରିବ ?

ଶ୍ୱାନ-ଶ୍ଵାପଦ ହେଣ୍ଟାଳିଲେ 

ଦୌଡିବା ଶେଷ ଅସ୍ତ୍ର ପ୍ରାଣ ବିକଳରେ

ଗର୍ବ-ଅହଁଙ୍କାର ହୁଙ୍କାରିଲେ 

କ'ଣ କରାଯାଇ ପାରିବ ?

ପାଦରେ କଣ୍ଟା ଫୋଡିଗଲେ 

ବାହାର କରିବା ଜରୁରୀ ପଡ଼େ

କଟୁ କଥା ଫୋଡିଗଲେ 

କ'ଣ କରାଯାଇ ପାରିବ ?

ରୋଗ ପାଇଁ ଔଷଧ 

ଦରକାର ପଡ଼େ

ମର୍ମଥରା ବେଦନା ହେଲେ

 କ'ଣ କରାଯାଇ ପାରିବ ?