ପ୍ରଶ୍ନ

ନିଜ ଭିତରେ ଉଠିଥିବା ପ୍ରଶ୍ନଟିକୁ

କଷାକଷି କରି ସମାଧାନ କଲା ବେଳକୁ

ଉଙ୍କିମାରେ ଅନ୍ୟ ଏକ ପ୍ରଶ୍ନ ।

ଥରେ ଭାବିଲେ କଠିନ 

ପୁଣି ଥରେ ଭାବିଲେ ସହଜ

ବାରମ୍ବାର ପ୍ରଶ୍ନ ପଢି ଉତ୍ତର ପ୍ରସ୍ତୁତ କରିବା ବେଳକୁ

ମୁଁ ହୋଇଯାଇଥାଏ ଅବୁଝା ।

ନିଜକୁ ପଚାରେ 

ଏତେ ପ୍ରଶ୍ନ କାହିଁକି ?

ପୁଣି ଉତ୍ତର ପାଏ

ଜୀବନଟା କଣ ଏତେ ଅଲୋଡା 

ତେବେ ପ୍ରଶ୍ନ ଆସିବା ସ୍ୱାଭାବିକ ।

ଅଣନିଃଶ୍ଵାସୀ ହୋଇଯାଏ ପ୍ରଶ୍ନ ଭିତରେ

ମସ୍ତିସ୍କର ସମସ୍ତ ବୁଦ୍ଧି ବିଚାର

ପ୍ରୟୋଗ କରି ସିଦ୍ଧାନ୍ତରେ ପହଞ୍ଚିବାକୁ ଚେଷ୍ଟା କରି

କେବେ ହୁଏ ବିଫଳ 

କେବେ ପୁଣି ସମାଧାନର ସୂତ୍ରଟିଏ ପାଇ 

ନାଚିଉଠେ ଖୁସିରେ ।

ପ୍ରଶ୍ନର ପରଦା ଆଡେଇ ଚାହେଁ ଜୀବନକୁ

ଆହା କେତେ ସୁନ୍ଦର !

ସହିପାରେନା ବୋଧ ହୁଏ ଭାଗ୍ୟ 

ପୁଣି ମୋ ସମ୍ମୁଖରେ ଆଉ ଏକ ପ୍ରଶ୍ନ ।

ପ୍ରଶ୍ନ ନା ଗୋଲକଧନ୍ଦା ।

ଘଣ୍ଟା ଘଣ୍ଟା ଆତ୍ମାନୁଶୀଳନ ପରେ

ହୋଇଯାଏ ହତୋତ୍ସାହ

ଭାଙ୍ଗିଯାଏ ମନ

ବିଳପି ଉଠେ ହୃଦୟ ।

ପ୍ରଶ୍ନଟିଏ ସ୍ୱତଃ ମୁଣ୍ଡଟେକି ଅନାଇଥାଏ

ସେଇ ପ୍ରଶ୍ନ ଭିତରେ ମୁଁ ପୁଣି ହଜିଯାଏ

ମୁକ୍ତ ଆକାଶରେ ଉଡ଼ିବୁଲୁଥିବା ପକ୍ଷୀର ଠିକଣା ଖୋଜିବାକୁ ।