ପରଂବ୍ରହ୍ମ ନାଉରୀ

ଜୀବନରେ ସୁଖ ଦୁଃଖ ଯାଉ ବା ନଯାଉ

ଥାଉ ଦିବ୍ୟ ଚେତନା ଭରି

ଲୁହ ଆଉ ଲହୁ ଥାଉକି ନଥାଉ ମୋ ପାଶେ

ମୁଗ୍ଧ ହୁଏ ଖାଲି ତୁମକୁ ଝୁରି

ଶୋଷ ଅବଶୋଷ ଆସୁ ନଆସୁ ଜୀବନେ

ଓଁ ଭଜୁଥାଏ ତୁମକୁ ସ୍ମରି

ଗତି ଅବା ମୁକ୍ତି ମିଳୁ କି ନମିଳୁ ଜୀବନେ

ଫଗୁଣ ଶ୍ରାବଣ ଅଶ୍ରୁ ଭରି

ଜପ ଅବା ତପ କରେ ବା ନକରେ ହୃଦେ

ହେଉଥାଏ ତୁମକୁ ଝୁରି

ଶହେଆଠ ବେଲପତ୍ର ତୋଳେ ନତୋଳେ

ରହିଥାଅ ହରି ପାର୍ଶ୍ଵ ଆବୋରି

ତୁଳସୀମାଳ ମୁଁ ଗୁନ୍ଥି ପିନ୍ଧାଏ ବା ନପିନ୍ଧାଏ

ନୟନେ ତୃଷ୍ଣା ରହୁ ଭରି

ମୋକ୍ଷ ମତେ ପ୍ରଭୁ ମତେ ମିଳୁ ବା ନମିଳୁ

ଛାଇଟିଏ ହୋଇ ରୁହ ପାଖେ ମୋହରି

ଚନ୍ଦନ ଧୂପ ଦୀପ ଝୁଣା ଦେଇନପାରିଲେ

ଛାଡି ଯିବ ନାହିଁ ପାଶୁ ମୋ ହରି

ଦିଏ କି ନଦିଏ ତୁଳସୀ ଅଗରୁ ପୂର୍ଣ୍ଣକଳସୀ

ଦିବ୍ୟ ଅନୁଭବ ହେଉ ମୋହରି

ପାପ ପୁଣ୍ୟ କିଛି ବୁଝେ କି ନବୁଝେ ମନେ

 ଜୀବନ ନିଅ ବାହୁ ପ୍ରସାରି

ପରଂବ୍ରହ୍ମ ତୁମେ ଅନାଦି ଅନନ୍ତ କାଳଦର୍ଶୀ

ଶେଷ ପାହାଚରେ ପାଦତଳେ ଯାନ୍ତି ଝରି ।