ପ୍ରକୃତିର ପରିଭାଷା

ଟିକି ଟିକି ଘାସ ସୁନାର ଫସଲ 

ଅଙ୍କା ବଙ୍କା ନଈ ଗିରି ବନ ବିଲ l

ଅଦୂର ପାହାଡ଼ ଅଖ୍ୟାତ ପଲ୍ଲୀ 

ଘଞ୍ଚ ବନାନୀର ବାସହୀନ ମଲ୍ଲୀ l

ସରିତ ସାଗର ଶ୍ୟାମଳ ତରୁ 

ପାର୍ବତ୍ୟ ଅଞ୍ଚଳ ବାଲୁକା ମରୁ l

ବ୍ୟସ୍ତ ଜନପଦ ଗହୀର ପାଟ 

ଦୂର ତାଳ ବଣ ନଦୀର ଘାଟ l

ନିର୍ଜନ ଇଲାକା ଅନ୍ଧାର ରାତି

ଶୂନ୍ ଶାନ୍ ପଥେ ବଢାଏ ଭୀତି l

ପଶୁ ପକ୍ଷୀ କୀଟ ପତଙ୍ଗ ଗଣ 

କରୁଥାନ୍ତି ଏଠି ନିତି ବିଚରଣ l

ଅନନ୍ତ ଆକାଶ ତାରକା ପୁଞ୍ଜ 

ରହସ୍ୟମୟ ଏ ଜହ୍ନ ରାଇଜ l

କେତେ ନଦ ନଦୀ ସରସୀ ହ୍ରଦ 

ମୁକ୍ତ ମାଳଭୂମି ବାଲୁକା କୁଦ l

ଫସଲ କିଆରୀ ଗହୀର ମାଳ 

ଲବଣାକ୍ତ ଆଉ ମଧୁର ଜଳ l

ପାହାଡ଼ କୋଳେ ଟିକି ଝରଣା 

ଚାଷୀ ଭାଇର ମାଟି ଅଗଣା l

ପାହାଡ଼ ଫାଙ୍କେ ବାଳ ସୂରୁଜ 

ଧରଣୀ ବୁକେ ବୁଣେ ମୁରୁଜ l

ଅଖ୍ୟାତ ପଲ୍ଲୀର ଗୋଧୂଳି କାଳ 

ଗୋରୁପଲଙ୍କର ବାହୁଡା଼ ବେଳ l

ବିଭାବରୀ ଅନ୍ତେ ଆସଇ ଉଷା 

ଏଇତ ପ୍ରକୃତିର ପରିଭାଷା l