ପ୍ରିୟା ପଞ୍ଚପଦୀ

ଆଲୋ ମୋ ପିରତି ମନର ମୂରତି 

ହୃଦଟା ଅକାତ ପାଣି, 

ପାଣି ଖେଳୁ ଖେଳୁ ଯଦି ଯାଏ ବୁଡି 

ପାରିକି ଆଣିବୁ ଟାଣି ?

ତୋ ଗଣ୍ଡେ ଭ୍ରମରେ ମୋ ମନ ଭ୍ରମର 

ମନ ତ ଯାଇଛି ଲାଖି

ମଧୁର ପରଶେ ଡଙ୍କ ଯଦି ବସେ

ପାରିବ କି ସହି ସଖୀ ?

ତୋ ବିମ୍ବ ଅଧର ଅତି ମନୋହର 

ପ୍ରତିବିମ୍ବ ଦିଶେ ମୋର

କେବେ ଛୁଇଁ ଦିଏ ଯଦି ସରାଗରେ 

କରି ତ ଦେବନି ପର ? 

ତୋ ଚୁର୍ଣ୍ଣ କୁନ୍ତଳ ମୋ ମନ ଉତ୍ତାଳ 

ହଜିବା ପାଇଁ କି ସତେ

ତା ତଳ ମଗଜ କରେ କିବା ହେଜ

କହିବ କି ଖୋଲି ମୋତେ ?

ତୋ ବେନି ନୟନ କରେ ସମ୍ମୋହନ

ଯେବେ ଯେବେ ତୋତେ ଦେଖି

ହୃଦୟ ସ୍ତମ୍ଭନ ମନ ଉଚ୍ଚାଟନ

ଦେବ କି ତାକୁ ସଳଖି ?