ପ୍ରୀତିଫୁଲ

ମୋ ମନ କାନନେ ମହକାଇ

      ତୁମେ ପ୍ରୀତିଫୁଲର ବାସ୍ନା।

ହଜାଇ ଦେଲ ମନ ଗହନେ

     ହୋଇଲି ମୁଁ ଗୋ ଆନମନ। ।।

ପ୍ରେମର ଜୋଛନା ମଧୁଝରା

       ବୁଣି ଦେଇଛ ଦେହ ସାରା ।

ଭୁଲିଗଲ ସିନା ତୁମେ ପ୍ରିୟା

    ମୋ ହୃଦେ ଅଛ ଅପାସୋରା ।।

ନିଶିଗନ୍ଧା ତୁମେ ରଜନୀର

       ମୋ ମନର ଚିର ସୁଗନ୍ଧା ।

ସୁରଭିତ କରି ମୋ ଜୀବନ

        ସାଜିଲ ତୁମେ ପ୍ରୀତିଛନ୍ଦା ।

ଭୁଲି ମୁଁ ଗଲି ମୋର ଅସ୍ତିତ୍ବ

        ହରାଇଲି ମୋର ନିଜସ୍ୱ ।

ତୁମେ ଚାଲିଗଲ ତୁମ ପଥେ

       ହୋଇଗଲି ମୁଁ ଗୋ ନିସ୍ବ ।।

ତୁମ ମାୟାବିନୀ ପୀରତିରେ

       ହେଲି ମୁଁ ପାଗଳ ଭ୍ରମର ।

ଛଳନା ଭରା ପ୍ରେମ ରଙ୍ଗରେ 

       ଭିଜାଇ ହେଲି ମୁଁ ଅଧୀର ।।

ତୁମ କ୍ଷଣସ୍ଥାୟୀ ପ୍ରେମରେ ମୁଁ

        ହରାଇ ସର୍ବସ୍ବ ଜୀବନେ ।

ତୁମ ଫେରିବାର ବାଟ ଚାହିଁ

       ପ୍ରତିଛବି ଆଙ୍କେ ସପନେ ।।

ଆଶ୍ୱାସନା ଟିକେ ଦେବା ପାଇଁ

      ଆସ ଗୋ ପ୍ରିୟା ଏକ ବାରେ ।

ତୁମ ପ୍ରୀତିରେଣୁ ଢାଳି ଦେଇ

        ଭିଜାଇ ଦିଅ ପୁଣି ଥରେ ।।