ଆସୁଛି କାଳିଆସୁନା

ଆସୁଛିରେ ମୋ କାଳିଆ ସୁନା

ରଥରେ ବସିବ ଭକତ ବିନା l

ବଡଦାଣ୍ଡ ଆଜି ପଡିଛି ଫାଙ୍କା 

ଶୁଣା ଯାଉ ନାହିଁ ଭକତ ଡକା ll

ପତିତ ଦର୍ଶନ ପାଇଁ ଏଯାତ

କାହିଁକି କରୁଛୁ ମିଛରେ ନାଟ l

ଦୁଇବର୍ଷ ହେଲା ବିନା ଭକ୍ତରେ

ରଥରେ ବୁଲୁଛୁ କେଉଁ ସୁଖରେ ll

ତୁ ପରା ଭକତ ବନ୍ଧୁ

ଭକତ ପାଇଁ ତୋ ନାମ କୃପାସିନ୍ଧୁ l

ଭକତର ଏହି ଦୁର୍ଦ୍ଦିନରେ

କେମିତି ନୀରବେ ବସିଛୁ ମନ୍ଦିରେ ll

ଅନନ୍ତ କୋଟି ବ୍ରହ୍ମାଣ୍ଡ

ତୋର ଇସାରାରେ ହୁଅନ୍ତି ରୁଣ୍ଡ l

ରଥରେ ରୂପ ବାମନ

ପୁନଃଜନ୍ମୁ ମୁକ୍ତି କଲେ ଦର୍ଶନ ll

ଦଳିତ ଦର୍ଶନ ପାଇଁ ବାହାରୁ 

ବରଷକୁ ଥରେ ଶ୍ରୀମନ୍ଦିରରୁ l

ଆଜି ଭକ୍ତ ବିନା ତୋ ନନ୍ଦିଘୋଷ 

ବଡଦାଣ୍ଡେ ବିଜେ ଲୀଳାମାନୁଷ ll

କାହାକୁ ଦେବୁ ତୁ ଆଜି ଦର୍ଶନ 

ତୋ ଭକ୍ତ ରହିଁଛି ହୋଇ ବନ୍ଧନ l

ଅଦୃଶ୍ୟ ଭୂତାଣୁ କରିଛି ଗ୍ରାସ 

ମୁକ୍ତି କର ପ୍ରଭୁ ନିବାରି ତ୍ରାସ ll

ପୂର୍ବପରି ଭକ୍ତ ହୁଅନ୍ତୁ ରୁଣ୍ଡ 

ପୁରି ଉଠୁ ତୋହର ବଡଦାଣ୍ଡ l

ଭକତ ଜନଙ୍କ ମନ ହରଷ

ଦରଶନ କରି ହୁଅନ୍ତୁ ତୋଷ ll