ପରିବର୍ତ୍ତନ

ବଦଳିବାର ଏକ ନିଚ୍ଛକ ଅଭିବ୍ୟକ୍ତି 

ସମୟକୁ ଜୀବନ୍ତ ସାବ୍ଯସ୍ତ କରିବାର 

ଏକ ପ୍ରୟାସ ନିରବଛିନ୍ନ

ଅବା ଆବର୍ତ୍ତନର ପରିଧିରେ ଶୀର୍ଷତାର

ଏକ ବୃଥା ପ୍ରହସନ ।

କେତେବେଳେ ଜୁଆରରେ ଏକ କୂଳରୁ 

ଆରକୂଳକୁ ବିସ୍ଥାପନ

ଅବା ପ୍ରଳୟଙ୍କାରୀ ବନ୍ଯାରେ 

ଭିଟାମାଟି ଠାରୁ ନିର୍ଯ୍ୟାସନ ।

ମୁଣ୍ଡ ଝାଳ ତୁଣ୍ଡେ ମାରି କଣ୍ଟକିତ ଦୁର୍ଗମ ପଥକୁ

ସଫଳତା ର ସୋପାନରେ ରୂପାନ୍ତରଣ

ଅବା ଖୋଷାମତି କରି ପାରିତୋଷିକରୁ 

ରାତାରାତି ରାଜେନ୍ଦ୍ରାସୀନ ।

ଅବଚେତନରୁ ଚେତନାର ସୂକ୍ଷ୍ମ ବିକାଶ

ଚଣ୍ଡାଶୋକରୁ ଧର୍ମାଶୋକ

ଅବା ପାଶବିକ ପ୍ରବୃତ୍ତି ରେ ମତୁଆଲା

କ୍ଷମତାସୀନ ହୋଇ ଶୋଷଣ ର ଜୟଗାନ ।

ଗୋଧୂଳି ର ଦୂର ଦିଗନ୍ତ ରେ ଆଖିପତାତଳେ

ହାଇମାରୁଥିବା କ୍ଲାନ୍ତ କାକୁସ୍ଥ ଜୀବନ

ଅବା ସନ୍ନିକଟ ଦିଗବଳୟ ରେ ସ୍ବର୍ଣ୍ଣାଭ ସୂର୍ଯ୍ୟୋଦୟ

ସ୍ନେହାଁଲ୍ହାଦିତ ଜୀବନର ମାଦକୀୟ ଯୌବନ ।

ସୀମିତ କେବଳ କ୍ୟାଲେଣ୍ଡରରେ ପୃଷ୍ଠା ଉନ୍ମୋଚନ

ଡିସେମ୍ବର ପରେ ନବ ବର୍ଷର ଉଚ୍ଚାଟ ଅଭିନନ୍ଦନ

ଅବା ମରା ରୁ ରାମ, ଉଇ ହୁଙ୍କାରୁ ବାଲ୍ମୀକି 

ଦାନବତ୍ବରୁ ଦେବ ତୁଲ୍ଯ ପରିମାର୍ଜନ ।