Library
Profile
ପରିବେଶ ପ୍ରଦୂଷଣ
ପରିବେଶ ପ୍ରଦୂଷଣ
ଜଳ ସ୍ଥଳ ବାୟୁ ମୂର୍ତ୍ତିକାକୁ ନେଇ
ଆମ ପରିବେଶ ପୁଷ୍ଟି
ପରିବେଶ ପାଇଁ ଜୀବଜଗତଟି
ରହିଥାଏ ସଦା ତିଷ୍ଠି ।
ଉଦ୍ଭିଦ ଜଗତ ପ୍ରାଣୀଙ୍କ ସହିତ
ମାନବ ଜାତିକୁ ନେଇ
ଜୀବଜଗତର ସୃଷ୍ଟି ଏ ବିଶ୍ୱରେ
ସଜୀବରେ ଗଣା ହୋଇ ।
ସଜୀବ ନିର୍ଜୀବ ସମ୍ପର୍କ ଭିତ୍ତିରେ
ପରିବେଶ ସନ୍ତୁଳନ
ସନ୍ତୁଳନ ନୀତି ଉଲଂଘନ କଲେ
ପରିବେଶ ନଷ୍ଟ ଜାଣ ।
ବିଜ୍ଞାନ ବଳରେ ସୁଜ୍ଞାନୀ ମାନବ
ନିଜ ସ୍ୱାର୍ଥ ସିଦ୍ଧି ପାଇଁ
ନିର୍ଭୟ ଚିତ୍ତରେ ଜଳ ସ୍ଥଳ ବାୟୁ
ପ୍ରଦୂଷଣ କରୁଥାଇ ।
ପୋଖରୀ ସମୁଦ୍ର ନଦୀ ନାଳ ହ୍ରଦ
ଭୂତଳ ଜଳର ଉତ୍ସ
ପ୍ରକୃତିର ଦାନ ଜୀବର ଜୀବନ
ଅମୃତ ହେଲାଣି ବିଷ ।
କଳ କାରଖାନା ଗୃହ ଆବର୍ଜନା
ରସାୟନ ବିଷ ପାଣି
ଚାଷ କ୍ଷତ ସାର ବିଷାକ୍ତ ଔଷଧ
ଜଳରେ ମିଶଇ ପୁଣି ।
ସଂକ୍ରମିତ ଜଳ ସଂସର୍ଗରେ ଆସି
ମୃତ୍ତିକା ଦୂଷିତ ହୁଏ
ଉର୍ବରତା କମି ଶସ୍ୟ ଉତ୍ପାଦନେ
ବାଧା ଉପୁଜାଇ ଥାଏ ।
ବୃକ୍ଷଲତାମାନ ଲାଗି ରୋଗପୋକ
ଅକାଳରେ ଯାଏ ଝଡି
ଧରଣୀ ରାଣୀର ଶିରି ତୁଟି ଯାଇ
ସବୁଜିମା ଯାଏ ଛାଡି ।
ବାୟୁ ମଣ୍ଡଳରେ ବିଷାକ୍ତ ଧୂଆଁର
ଆସ୍ତରଣ ଜମି ରହି
ପ୍ରଦୂଷଣ ମାତ୍ରା ବୃଦ୍ଧି ହୋଇ ଚାଲେ
ନିଶ୍ୱାସେ ବିଶ୍ୱାସ ନାହିଁ ।
ଗନ୍ଧକ ଅଙ୍ଗାର ଯବକ୍ଷାରଜାନ
ଅମ୍ଳଜାନରେ ଜାରିତ
ବିଷାକ୍ତ ଧୂଆଁର ନିର୍ଗତ କାରଣେ
ବାୟୁମଣ୍ଡଳ ଦୂଷିତ ।
ପବନ ସହିତ ଯବକ୍ଷାରଜାନ
ଗନ୍ଧକର ଅମ୍ଳ ମିଶି
ଜଳ ସ୍ଥଳ ନଦୀ ବନ କୀର୍ତ୍ତିରାଜି
ନଷ୍ଟ କରେ ଅମ୍ଳ ବୃଷ୍ଟି ।
କୋଇଲା ସହିତ ଖଣିଜ ଜାଳେଣି
ବ୍ୟବହାର ବୃଦ୍ଧି ହୋଇ
ବାୟୁ ମଣ୍ଡଳକୁ ପ୍ରଦୂଷିତ କରେ
ଦେଖିବାକୁ କେହି ନାହିଁ ।
ଘରେ ଓ ବାହାରେ ଜରି ପଲିଥିନି
ପ୍ଲାଷ୍ଟିକର ବ୍ୟବହାର
ଜଳ ସ୍ଥଳ ବାୟୁ ଦୂଷିତ କରୁଛି
ଅବକ୍ଷୟ ନାହିଁ ଯା'ର ।
କେତେ ପଶୁପକ୍ଷୀ ପଲିଥିନ ଭକ୍ଷି
ଅକାଳେ ଯାଆନ୍ତି ମରି
ସବୁ ଦେଖି ଶୁଣି ସ୍ୱାର୍ଥାନ୍ଧ ମଣିଷ
ପ୍ଲାଷ୍ଟିକି ପାରୁନି ଛାଡ଼ି ।
ରାସ୍ତାରେ ଗଡୁଛି ଅସଂଖ୍ୟ ପୁରୁଣା
ପ୍ରଦୂଷଣ ଯୁକ୍ତ ଗାଡି
ଇଞ୍ଜିନି ଛାଡ଼ୁଛି ଘନ କଳା ଧୂଆଁ
ତୈଳ ଇନ୍ଧନକୁ ପୋଡି ।
ତାପମାତ୍ରା ସଙ୍ଗେ ବାୟୁ ପ୍ରଦୂଷଣ
କାଳକ୍ରମେ ଚାଲେ ବଢି
ଅସହ୍ୟ ଗରମେ ରହି ହେଉନାହିଁ
ଶିତତାପ ଗୃହ ଛାଡି ।
ଥଣ୍ଡା ଯନ୍ତରଟା ଘର ଥଣ୍ଡା ରଖି
ଗରମକୁ ଦିଏ ତଡି
ସେଥିପାଇଁ ପୁଣି ବିଶ୍ୱ ତାପମାତ୍ରା
&n
bsp;ଆହୁରି ଯାଉଛି ବଢି ।
ଶିଳ୍ପ କାରଖାନା ଯନ୍ତ୍ରପାତି ସଙ୍ଗେ
ଯାନବାହାନର ଧ୍ୱନି
ଡ଼ାକବାଜି ଯନ୍ତ୍ର ଡିଜେବାଜା ଶବ୍ଦ
ରେଲଗାଡି ବାଣ ପୁଣି ।
ଶବ୍ଦ ପ୍ରଦୂଷଣ ହେଉଛି ଭୀଷଣ
ଶ୍ରବଣ ଶକ୍ତିର ହ୍ରାସ
ପାରସ୍ୱନିକ ବିଜ୍ଞାନ ଧ୍ୱନୀରେ
ବୃଦ୍ଧି ପାଏ ରୋଗ ଦୁଃଖ ।
ହୁଏ ମୁଣ୍ଡ ବିନ୍ଧା ମାନସିକ ଚିନ୍ତା
ହୃଦ ସ୍ପନ୍ଦନର ବୃଦ୍ଧି
ଉଚ୍ଚ ରକ୍ତଚାପ କରେ ହୃଦଘାତ
କମିଯାଏ ଆମ ଶକ୍ତି ।
ଆମ ଶ୍ଵାସକ୍ରିୟା ହଜମ ପ୍ରକ୍ରିୟା
ହୋଇଥାଏ ପ୍ରଭାବିତ
ନିଦ୍ରାରେ ବ୍ୟଘାତ ସ୍ନାୟବିକ ରୋଗ
ପୁଣି ହୁଏ ଗର୍ଭପାତ ।
ଆଣବିକ ଶିଳ୍ପ ଉଜ୍ବଳ ଆଲୋକ
ବିକିରଣ ପ୍ରଦୂଷଣ
ଆଣବିକ ଅସ୍ତ୍ର ଉତ୍ପାଦନ ଅଟେ
ଏହାର ମୁଖ୍ୟ କାରଣ ।
ଆଲୋକ ତୀବ୍ରତା ଏମିତି ହୋଇବ
ହଜିଯିବେ ଚନ୍ଦ୍ର ତାରା
ରାତିରେ ଖୋଜିଲେ ମିଳିବନି କେବେ
ଆଖିକୁ ଦେବେନି ଧରା ।
ଜଳ ସ୍ଥଳ ବାୟୁ ପ୍ରଦୂଷଣ ପାଇଁ
ତାପମାତ୍ରା ବୃଦ୍ଧି ହୋଇ
ମେରୁରେ ବରଫ ପାଣି ହୋଇ ଏବେ
ସମୁଦ୍ରକୁ ଚାଲେ ବହି ।
ସମୁଦ୍ର ପତ୍ତନ କୂଳକୁ ଲଙ୍ଘିବ
ଆସେ ସମୟ ପାଖେଇ
ଉପକୂଳେ ଥିବା ତଳିଆ ଅଞ୍ଚଳ
ସମୁଦ୍ର ମିଶିଵ ଯାଇ ।
ବାରମାସେ ଷଡ଼ ଋତୁ ଚକ୍ର ତାର
ସନ୍ତୁଳନ ହରେଇବ
ଜଳବାୟୁ ସଙ୍ଗେ ବିଶ୍ୱ ପାଣିପାଗ
ଅସମୟେ ବଦଳିବ ।
ବନ୍ୟା ବାତ୍ୟା ସହ ଦୈବୀ ଦୁର୍ବିପାକ
ଅଦିନେ ଆସିବ ମାଡି
ଜୀବଜଗତକୁ ପାଣି ପବନରେ
ନେଇଯିବ କାହିଁ ତଡି ।
ପରିବେଶ ରକ୍ଷା ଜୀବନ ସୁରକ୍ଷା
ସମସ୍ତଙ୍କୁ ଅଛି ଜଣା
ଜାଣିଶୁଣି ଆଜି ମାନବ ସମାଜ
ସ୍ୱାର୍ଥପାଇଁ ବାଟବଣା ।
ସୁସ୍ଥ ପରିବେଶ ପ୍ରଦୂଷଣ ମୁକ୍ତ
ସବୁଜ ଧରଣୀ ପାଇଁ
ଚାଲ ପ୍ରତିବର୍ଷ ଗଛ ଲଗେଇବା
ପ୍ରକୃତିର ମିତ୍ର ହୋଇ ।
ପେଟ୍ରୋଲ ଡିଜେଲ ଇନ୍ଧନ ଗାଡିକୁ
ପାଖରୁ ଦେବା ଦୂରେଇ
ପ୍ରଦୂଷଣ ମୁକ୍ତ ବିଜୁଳି ଓ ଗ୍ୟାସ
ଗାଡି ନେବା ଆପଣେଇ ।
ଶିଳ୍ପ କାରଖାନା ଗୃହ ଆବର୍ଜନା
ସୁପରିଚାଳନା କରି
ପରିବେଶ ପାଇଁ ଉପଯୋଗୀ କଲେ
ସବୁଜିମା ଯିବ ଭରି ।
ପ୍ରକୃତି ସହିତ ମିତ୍ରତା କରିବା
ସ୍ୱଚ୍ଛତାକୁ ସାଥି କରି
ସର୍ବେ ନିରାମୟ ଜୀବନ ଜିଇଁବା
ପ୍ରଦୂଷଣ ଦେଲେ ମାରି ।
