ପରିବାର

ଛୋଟ ମୋର ପରିବାର ଛୋଟ ମୋର ସଂସାର,

ଆନନ୍ଦର ଆଦ୍ୟରାଗ ଅଲକ୍ତକ ସ୍ନେହର ।

ସମ୍ପର୍କର ସେତୁଟିଏ ଆଶାର ଭାର୍ଗବୀ,

ସୁବିମଳ ଅନୁରାଗ ପ୍ରାଣର ଜାହ୍ନବୀ ।

ଆଦର୍ଶର ଆଲୋକିତ କୁହୁକ କାକଳୀ,

ପ୍ରଣବ ଓଁକାର ଧ୍ୱନୀ ଅମ୍ଳାନ ସରଣୀ ।

କଳ୍ପନାର ଚଉହଦି ଆନନ୍ଦବାଟିକା,

ଅନୁବନ୍ଧନ ଚିତ୍ରଶାଳା ଅମୃତ ଘଟିକା ।

ହୃଦୟର ସମାସକ୍ତା ଜୀବନର ତର୍ପଣ,

ଦୁଃଖ ଶୋକ, ସୁଖ ସ୍ବପ୍ନ ସନ୍ତୋଷର ଦର୍ପଣ ।

ଚର୍ଯ୍ୟାମୟ ବିହ୍ଵଳିତ ଆପଣା ପଣର,

ଅନନ୍ୟ ପ୍ରବାହମାନ ଆତ୍ମୀୟବୀଣାର ।

ଜାଗତିକ ମାୟାମଗ୍ନ ପ୍ରୀତିରାଗ ପ୍ରସୂନ

କୋରକିତ ମମତାର ସ୍ରୋତସ୍ୱିନୀ ଜୀବନ ।

କଳକଳ ବହିଯାଏ ସ୍ୱଚ୍ଛ ସ୍ବରଲିପି,

ଲୁହ ଲହୁ ହସ ମିଶା ପ୍ରାଣ ପ୍ରତିଛବି ।

ପରିବାର ସମର୍ପିତ କର୍ତ୍ତବ୍ୟ ଯଜ୍ଞରେ,

ସଂକଳ୍ପର ମହାମନ୍ତ୍ର ଆହୁତି ତ୍ୟାଗରେ ।

ଜନ୍ମ ଠାରୁ ମୃତ୍ୟୁ ଯାଏଁ ପରିବାର ସାଥିରେ,

 ତୁଳୀ ଧରି କାନଭାସେ କେତେ ଛବି ଆଙ୍କେରେ ।