ପ୍ରେମରେ ଛଳନା
ପ୍ରେମରେ ଛଳନା
ଭଲ ପାଇଥିଲି ହୃଦୟ ଭରି ମୁଁ
ମନେ ଥିଲା କେତେ ଆଶା,
ଅଧା ବାଟଟାରେ ଛାଡି ଚାଲିଗଲ
ତୁଟାଇ ଦେଲ ଭରସା |
ଜାଣି ମୁଁ ନଥିଲି ଦଗା ଦେବ ବୋଲି
କାହିଁକି ଏମିତି କଲ,
ଯନ୍ତ୍ରଣାରେ ମୋର ସମୟ ବିତୁଛି
କିଛି ଲାଗେନାହିଁ ଭଲ |
ଅଭିନୟ ତୁମ ଵୁଝି ପାରିଲିନି
ଛଳନାରେ ବାନ୍ଧିଦେଲ,
ଭଲ ପାଇବାର ସବୁ ଅଙ୍ଗୀକାର
କେମିତି ଯେ ଭୁଲିଗଲ |
ସ୍ବପ୍ନ ମୋର ସବୁ ଜାଳିଦେଲ ତୁମେ
ତୁମ ସୁଖ ତୁମେ ବାଛି,
ରିକ୍ତ ହୃଦୟ ମୋ ଭୁଲି ପାରୁନାହିଁ
ସବୁ ସ୍ମୃତି ମନେ ଅଛି |
ନଈ ପଠାପରେ ବୁଲୁଥିଲ ତୁମେ
ସେତେ ବେଳେ ହାତ ଧରି,
ପ୍ରୀତିର ରଙ୍ଗରେ ଭରା ଯଉବନ
ତୁମ ଦେହେ ଥିଲା ଭରି |
ଏତେ ଭଲ ପାଇଁ କେମିତି ଭୁଲିଲ
ପାରେନା ମୁଁ କେବେ ଵୁଝି,
ଛଳନାରେ ଏତେ ମିଛ ଅଭିନୟ
କଲ ପ୍ରେମିକା ମୋ ସାଜି |
ତୁମ ଛଳନାରେ ଜୀବନ ମୋ ଆଜି
ନିଃସଙ୍ଗ ମରୁର ସାଥି,
ବଞ୍ଚି ବି ମରୁଛି ଦିନ, ବର୍ଷ,ମାସ
ଯନ୍ତ୍ରଣାରେ ଯାଏ ବିତି |
ତୁମେ ସିନା ସାଥି ଭୁଲିଗଲ ମୋତେ
ମୁଁ କିନ୍ତୁ ପାରିନି ଭୁଲି,
ତୁମ ସ୍ମୃତି ସବୁ ରହି ରହି ଆସେ
ଦେଖାଏ ମରୁର ବାଲି |
ଜାଣେନା କେମିତି ଜୀବନ କଟିବ
ଏକାକୀତ୍ୱ ଭରେ ପ୍ରାଣେ,
ତୁମପାଇଁ ଘୃଣା ସଞ୍ଚିତ ହେଉଛି
ନଚାହିଁ ବି ମୋର ମନେ |