ପ୍ରେମର ପରିଭଷା
ପ୍ରେମର ପରିଭଷା
ଅନ୍ତୁଡି ଶାଳରୁ ମଶାଣିର ଯାଏଁ
ଗାଉଛେ ପ୍ରେମ ସଂଗୀତ ।
ତଥାପି ପ୍ରେମର ପରିଭାଷା ଲେଖି
ଗାଇବାରେ ଅସମର୍ଥ ।।
ପ୍ରେମ ଜଗତରେ ପ୍ରାଣର ଆଧାର
ଦିବ୍ୟ ଚେତ୍ତନାର ଭାବ।
ରସମନ୍ଦାକିନୀ ଅମୃତର ଧାର
ସାତ୍ତ୍ଵିକ ଜ୍ଞାନ ବିଭବ ।।
ଜାଣନ୍ତି ସମସ୍ତେ ଏ ମାୟା ଜଗତେ
ପ୍ରେମ ଚିରନ୍ତନ ସତ ।
ମୀରାବାଇ ଶ୍ୟାମ ରାଧାକୃଷ୍ଣ ପ୍ରେମ
ଗାଉଛି ନିତି ଜଗତ ।।
ବକ୍ସିଜଗବନ୍ଧୁ ରଘୁ-ଦିବାକର
ଭଗତସିଂ ଦେଶ ପ୍ରେମ।
ସଦା ସ୍ମରଣୀୟ ବ୍ୟାସ ବାଲମିକ
ଭାଷା ବିଜ୍ଞାନ ସାଧନ ।।
ଉତୁଂଗ ଶିଖରୁ ବନ୍ଧୁର ପଥରେ
କୁଳୁକୁଳୁ ଗୀତ ଗାଇ ।
ପ୍ରୀତି ର ମିଳନ ନିର୍ଝରିଣୀ କରେ
ସାଗର ବେଳାରେ ଯାଇ।।
ଜହ୍ନର ଜୋଛନା ଦେଖି କୁମୁଦିନୀ
ବିକଶି ମୁରୁକି ହସେ ।
ରାମ ନାମ ପ୍ରେମେ ଲେଖିଲେ ପାଷାଣେ
ସାଗର ଜଳରେ ଭାସେ ।।
ରସ ଗନ୍ଧ ସ୍ପର୍ଶ ଶୃତି ସହ ଦୃଶ୍ୟ
ଇନ୍ଦ୍ରିୟ ପ୍ରେମ ଲାଳସା ।
ନୁହେଁ ଦେହ ପ୍ରୀତି ସୌଭାଗ୍ୟ ସମ୍ପତ୍ତି
ସତ୍ୟ ପ୍ରେମ ପରିଭାଷା ।।