ପ୍ରେମୋଦୟ ଚମ୍ପୁ (ଶ)

(32)

ପ୍ରେମୋଦୟ ଚମ୍ପୁ

ରାଧାଙ୍କ ପ୍ରତି ସଖୀ

ରାଗ - ମଙ୍ଗଳ ଗୁଜ୍ଜରୀ -  ଆଦିତାଳ

ସଖି, ନ ବସ ତୁ ଗୁମାନେ (ଘୋଷା)

ଶୁଣି ଶ୍ୟାମ ତୋର ବାଣୀ - ପ୍ରାଣ କଣ୍ଠତଟେ ଆଣି

ରଖିଲା ପରି ରେ ଦିଶେ ଅନୁମାନେ (1)

ଶରଦଚନ୍ଦ୍ରମା ମୁଖୀ - କରତୁ ଶ୍ୟାମକୁ ସୁଖୀ

ଅଧର ମଧୁର ସୁଧା ରସପାନେ (2)

ଶପତ କଲାଣି ବେଣୁ - ଛୁଇଁ ତ ନୀରଦତନୁ

ମନେ ହେଲେ ନ ରସିବି ବୋଲି ଆନେ (3)

ସହିରେ ତୁ ଦୟାବତୀ, - ବୋଲାଇ ନିଷ୍ଠୁର ଅତି -

ହେବାର ଆଜ ଗୋ ଘେନ ତୋତେ ଯେ ନ ମାନେ (4)

ସହରସେ ରାଜଇନ୍ଦୁ ଭଣଇ ସେ ପ୍ରାଣବନ୍ଧୁ

କର କରୁଣାକୁ ଦିବ୍ୟ ଅବଧାନେ (5)