ପ୍ରେମିକାର ଘର

କିଏ ସେ ଦେଖିଛି ନନ୍ଦନବନ ଲୋ

କେ ଦେଖିଛି ସ୍ୱର୍ଗପୁର

ସ୍ୱର୍ଗସୁଖ ଶିରୀ ଦେଖିବ ଯଦି ଗୋ

ବୁଲିଯାଅ ପ୍ରିୟାଘର I

ପ୍ରେମର ପୃଥିବୀ କେଉଁଠୁ ଆରମ୍ଭ

କେହି ହେଲେ ଜାଣିନାହିଁ

ଶେଷ କିନ୍ତୁ ତାର ମୋ ପ୍ରିୟାର ଘର

ମରତ୍ତେ ସରଗ ଭୂଇଁ I

ସେଇ ଘରେ ମୋର ସଖୀର ଜନମ

ସେଇ ଘର ପ୍ରିୟ ତାର 

ସେ ଘର ମାଟିରେ ଲେଖି ଦେଇଛି ମୁଁ

ମୋ ପ୍ରେମର ଇସ୍ତାହାର I

ଜୀବନ କେବେ ଲୋ ଜୀବନ ନୁହଁଇ

ଯେଉଁଠାରେ ନାହିଁ ପ୍ରେମ

ସେପାଇଁ ଲୋ ସଖୀ ଜୀବନ ବହିରେ

ଲେଖିଛି ମୁଁ ତୁମ ନାମ I

ପ୍ରେମର ନଗରେ ଫଗୁଣର ରଙ୍ଗ

ଆଖି ଝଲସାଇ ଦିଏ

ଅଦିନ ବରଷା ବେଳେ ବେଳେ ଆସି

ରଙ୍ଗ ସବୁ ଧୋଇ ନିଏ I

ତଥାପି ଲୋ ସଖୀ ପ୍ରେମ ହିଁ ମହାନ

ପ୍ରେମ ସତ୍ୟ ମନୋହର I

ଆମ ପ୍ରେମ ଏକ ଆଲୋକିତ ପଥ

ଛୁଇଁନାହିଁ ଅନ୍ଧକାର I