ପ୍ରେମ

ପ୍ରେମ ନୁହେଁ କେବେ ମରୁ ମରୀଚିକା

  ପାଶେ ଗଲେ ଘୁଞ୍ଚିଯିବ

ପ୍ରେମ ଅଟେ ଦୁଇ ଆତ୍ମାର ମିଳନ

  ଯୁଗେ ଯୁଗେ ରହିଥିବ ।

ପ୍ରେମ ନୁହେଁ ସତେ କାଚର ଆଇନା

  ପଡିଗଲେ ଭାଙ୍ଗିଯିବ

ପ୍ରେମ ଅଟେ ସ୍ନେହ ପ୍ରୀତିର ବନ୍ଧନ

  ଆଦରିଲେ ବାନ୍ଧିହେବ ।

ପ୍ରେମ ନୁହେଁ ବେଳାଭୂମି ବାଲିଘର

  ଲହରୀରେ ଭାଙ୍ଗିଯିବ

ପ୍ରେମ ଅଟେ ମୃଦୁ ମଳୟ ମହକ

   ଚିରଦିନ ମହକିବ । 

ପ୍ରେମ ନୁହେଁ କେବେ ବିରହ ବେଦନା

   ନୟନର ଅଶ୍ରୁଧାରା

ପ୍ରେମ ଅଟେ ମେଘ ମଲ୍ଲାର ରାଗିଣୀ

   ଶ୍ରାବଣର ବାରିଧାରା ।

ପ୍ରେମ ନୁହେଁ ଅବା ଜଟିଳ ଗଣିତ

   ବୁଝିବାରେ କଷ୍ଟ ହେବ

ପ୍ରେମ ଅଟେ ଏକ ସରଳ ସାହିତ୍ୟ

   କବିତାର ପ୍ରେମ ଭାବ ।

ପ୍ରେମ ନୁହେଁ କେବେ କାଳ ବଇଶାଖୀ

   ଅଦିନରେ ଝଡ଼ହେବ

ପ୍ରେମ ଅଟେ ଏକ ଋତୁ ମଉସୁମୀ

   ହୃଦୟରେ ବରଷିବ ।

ପ୍ରେମ ନୁହେଁ କେବେ ଅଢେଇ ଦିନିଆ

  ମଉଳା ରଜନୀଗନ୍ଧା

ପ୍ରେମ ଅଟେ ମଧୁ ମଧୁର ସମ୍ପର୍କ

   ମଳୟର ମଧୁଛନ୍ଦା ।

ପ୍ରେମ ନୁହେଁ କେବେ ଝରା ଶେଫାଳି 

   ରଜନୀରେ ଝଡ଼ିଯିବ

ପ୍ରେମ ଅଟେ ସତ୍ୟ ଜୀବନ୍ତ ଶାଶ୍ୱତ

   ଚିର ଦିନ ରହିଥିବ ।