ହେ ଶୀତ
ହେ ଶୀତ
ହେମନ୍ତ ଋତୁକୁ ମେଲାଣି ଦେଇଣ
ଆସିଅଛି ଋତୁରାଣୀ
ଶୀତୁଆ ସକାଳ କଅଁଳ ସୂରୁଜ
ନେଉଛିରେ ମନକିଣି ।
ଧୂମ କୁହୁଡ଼ିର ଧବଳ ଚାଦର
ଧରଣୀକୁ ଢାଙ୍କିଦିଏ
ଘାସ ପତରରେ କାକର ବିନ୍ଦୁଟି
ମୋତିପରି ଦିଶୁଥାଏ ।
ସୁଲୁସୁଲୁ ବହେ ଶୀତଳ ସମୀର
ଶିହରଣ ଖେଳେ ଅଙ୍ଗେ
ଶୀତ ସକାଳର ପହିଲି ପରଶେ
ବଧୂଟି ଅଳସ ଭାଙ୍ଗେ ।
ଶୀତ ଆସିଗଲେ ଲୋଡାହୁଏ ପୁଣି
ଚୁଲିମୁଣ୍ଡ ପାଖ ନିଆଁ
ଶୀତୁଆ ସକାଳେ ମଜାଲାଗେ ପୁଣି
ପହିଲି ସୂରୁଜ ଛୁଆଁ ।
ପୁଷ୍ପ ସମ୍ଭାରରେ ଧରଣୀ ରାଣୀଟି
ଦିଶେ ବଡ ମନୋହର
ହଳଦୀ ରଙ୍ଗର ସୋରିଷ କ୍ଷେତରେ
ଲୁଚକାଳି ଖେଳେ ଭ୍ରମର ।
ଶାମ୍ବଦଶମୀକୁ ସରସ୍ବତୀ ପୂଜା
ତା' ସଙ୍ଗରେ ଲକ୍ଷ୍ମୀପୂଜା
ପଞ୍ଚୁକ ତିଥିରେ ପଞ୍ଚ ମୁରୁଜରେ
ହୁଏ କେତେ ସାଜସଜ୍ଜା ।
ଚଷାଭାଇ ମନ ଆନନ୍ଦରେ ନାଚେ
ଦେଖିତା'ର ସୁନାକ୍ଷେତ
ବାଘୁଆ ଶୀତକୁ ଖାତିରି ନକରି
ଆନନ୍ଦରେ ଗାଏ ଗୀତ ।
ବରଷକେ ଆସେ ଛଅଗୋଟି ଋତୁ
ଋତୁରାଣୀ ଅଟେ ଶୀତ
ସବୁ ଦୁଃଖକଷ୍ଟ ଭୁଲିଯାଇ ଆମେ
ଗାଇବାରେ ମୈତ୍ରୀ ଗୀତ ।