ପ୍ରେମ ପରିଭାଷା

ପ୍ରେମ ପରିଭାଷା ଅଲଗା ଅଲଗା

ସ୍ଥାନ କାଳ ପାତ୍ର ନେଇ

ବୁଝିପାରେ ଯିଏ ତା ଜୀବନ ପଥ

ଯାଏରେ ସୁଗମ ହୋଇ ।

ବାପା ମାଆଙ୍କର ବାତ୍ସଲ୍ୟ ପ୍ରେମକୁ

ଭାଷାରେ ହୁଏନି କହି

ଦେବାରେ ଥାଏତ ଆନନ୍ଦ ସେଥିରେ

ପାଇବାର ଆଶା ନାହିଁ ।

ଭାଇ ଭଉଣୀଙ୍କ ଅନାବିଳ ପ୍ରେମ

ପବିତ୍ର ବନ୍ଧନ ସେତ

ପରିଭାଷା ତାର ନୀଳାଚଳ ଧାମେ

ବଖାଣନ୍ତି ଜଗନ୍ନାଥ ।

ସ୍ବାମୀ ସ୍ତ୍ରୀଙ୍କର ପ୍ରେମ ପରିଭାଷା

ପ୍ରତି ପାଦେ ବୁଝାମଣା

ହୃଦୟ କୁ ଯହିଁ ଜିଣି ନପାରିଲେ

ମନ ହୁଏ ବାଟବଣା ।

ରାଧାକୃଷ୍ଣଙ୍କର ଅପ୍ରାକୃତ ପ୍ରେମ

ଭକ୍ତିଭରା ଚଉତିଶା                 

ପରମାତ୍ମା ସହ ଆତ୍ମା ର ମିଳନ

ସେ ପ୍ରେମର ପରିଭାଷା ।

ପ୍ରେମତ ପବିତ୍ର ସାଶ୍ବତ ସୁନ୍ଦର

ମଧୁର ତା ପରିଭାଷା

ଈଶ୍ୱରଙ୍କ ପ୍ରେମ ଭାବର ସାଗର

ପୂର୍ଣ୍ଣ କରେ ମନ ଆଶା ।