ପ୍ରେମ କାହିଁ
ପ୍ରେମ କାହିଁ
ଦେହ ଭର୍ତ୍ତି ଯୌବନର ସ୍ପର୍ଶ ନେଇ ,
ପାର୍କରେ , ରାସ୍ତାକଡେ ଅବା ରେଷ୍ଟୁରାଣ୍ଟରେ ,
ସବୁଠି ଚୁମ୍ବନ
ମାଳମାଳ ପ୍ରେମ ପକ୍ଷୀ ,
ହେଲେ ପ୍ରେମ କାହିଁ ?
ମତୁଆଲା ଓଠରେ ପ୍ରେମିକା ଫୋନ୍ କରେ ,
ସାରା ଦିନ , ସାରା ରାତି ମୋବାଇଲ୍ ରେ ଚାଟ୍ କରେ ,
ଲ୍ୟାପଟପ୍ ରେ ଭିଡିଓ କଲ୍ ରେ ଆସେ ,
ଦର ଘୋଡା ସ୍ତନ ଦ୍ଵୟଙ୍କୁ ଦେଖାଇବାକୁ ଚେଷ୍ଟା କଲାବେଳେ -
ମୁଁ ନିଜକୁ ପ୍ରଶ୍ନ କରେ !
ପାର୍କରେ ବିସ୍ତୀର୍ଣ୍ଣ ଇଲାକାରେ ବୁଲୁବୁଲୁ ,
ଅପରାହ୍ନେ ଦୁଇ ଓଠ ମିଶେ !
ଅସାଡ ଦେହରେ ଦେହଟି ଓଜାଡି ହୁଏ ,
କିଛି କ୍ଷଣ ହସାହସି ହୁଅନ୍ତି ଦୁହେଁ ,
କ୍ଷୁଧା ତାଙ୍କ ମେଣ୍ଟି ସାରିଥାଏ !
ବାକ୍ସ କଣୁ ମୁଁ ପୁରୁଣା ଚିଠି ପଢେ ,
ହାତ ଲେଖା ଅତରର ବାସ୍ନା ଝଡିଥିବା -
ସୁନ୍ଦର ହସ୍ତାକ୍ଷରେ ଲେଖାଥିବା ଚିଠି ।
ଫିକା ଗୋଲାପୀ କାଗଜରୁ ରଙ୍ଗ ମଉଳେ ।
ଚିଠି ପାମ୍ପରା ହୁଏ ,
ସେ ଚିଠି ବାରମ୍ବାର ବିଜନରେ ପଢାହୁଏ !
ସକାଳ ହୁଏ ଚିଠିଟିରେ ରାତି ପାହିଯାଇ ,
ମୁଁ ନିଜଠାରୁ ପୁନଶ୍ଚ କୈଫିୟତ ମାଗେ -
"ପ୍ରେମ ବୋଲି ଯେଉଁ ଶବ୍ଦଟି ସେ କାହିଁ ?"