ପ୍ରବାଦପୁରୁଷ ବିଜୁ ପଟ୍ଟନାୟକ
ପ୍ରବାଦପୁରୁଷ ବିଜୁ ପଟ୍ଟନାୟକ
ନୁହେଁ ବନ୍ଧୁ, ନୁହେଁ ବିଜୁ ମୃତ
ଅର୍ବାଚୀନ କଳିଂଗର ପ୍ରଗତିର
ଯେହୁ ଅଗ୍ରଦୂତ ।
ତେବେ ଏହି ଶ୍ରାଦ୍ଧ କାହା ପାଇଁ?
ଶ୍ରାଦ୍ଧ ନୁହେଁ ଶ୍ରଦ୍ଧା ବୋଧେ ଏହା,
କଳିଂଗର ମହାରଥୀ ପାଇଁ ।
ଶାଳପ୍ରାଂଶୁ ବ୍ୟକ୍ତିତ୍ବ କି କେବେ
ମୃତ୍ୟୁ ଦ୍ବାରା ହୁଏ କବଳିତ
ପୁଷ୍ପମାଳା ଆଘାତରେ କି ରେ
ଧରାଶାୟୀ ହୁଏ ଐରାବତ ।
ଝଡର ଇଗଲ୍ କି କେବେ
ଝଡ ଠାରୁ ଲଭେ ପରାଭବ
ନନ୍ଦିଘୋଷ ଜାତିର ଯେ ବାହେ
ତା’ର କେବେ ହୁଏ କି ବିୟୋଗ ।
ବିଶ୍ରମିଛି ବୀର ବାରେ
ଅବିଶ୍ରାନ୍ତ ଘନ ଘଟା ପରେ
ସଂଗ୍ରାମର, ଉଠିବ ସେ
ଚକ୍ଷୁ ମଳି କିଛି କ୍ଷଣ ପରେ ।
ଉଠି ପାରେ ନିଦ୍ରା ତେଜି ସେହି
ନିଜ ସୁଖେ ନୂତନ ରୂପରେ,
ମରଣ କି ଅଛି କେବେ ମୃତ୍ୟୁଜୟୀ
ପୁରୁଷର କପାଳ ଲେଖରେ ।
ବୀରପ୍ରସୂ ଉତ୍କଳ ଜନନୀ
ପ୍ରସବିଲା ଯେ ବୀର ସନ୍ତାନ,
ଦେହ ତାଙ୍କ ମିଶିଛି ମାଟିରେ
ଯଶୋ ଦେହେ ସର୍ବେ ଆୟୁଷ୍ମାନ ।
ବୀର ରକ୍ତେ ଉର୍ବର ଏ ମାଟି
ଉପୁଜାଏ ନୂତନ ଫସଲ,
ସେହି ବୀରେ ଜନମନ୍ତି ପୁଣି
ଘଟ ପରିବର୍ତ୍ତନ କେବଳ ।
ସେହି ନ୍ୟାୟେ ହୋଇ ପାରେ ବିଜୁ
ମହାରାଜ ଖାରବେଳ ଐର,
ଅବା ସେହି ବକ୍ସି ଜଗବନ୍ଧୁ
କିମ୍ବା ପୁଣି ଜୟୀ ରାଜଗୁର ।
ଅବା ପୁଣି ହୋଇପାରେ ସିଏ
କାଂଚିଜୟୀ ପୁରୁଷ-ଉତ୍ତମ,
କିମ୍ବା ପୁଣି ବାମଣ୍ଡାର ରାଜା
ବାସୁଦେବ ସୁଢଳ ତା ନାମ ।
ତେବେ ଏହି ଯଶସ୍ବୀ ପୁରୁଷ
ମୃତ୍ୟୁ ମୁଖେ ପଡି ପାରେ କି ରେ
ମୃତ୍ୟୁର ବା ଏତେ ଶକ୍ତି କାହିଁ
ପୋଛିବାକୁ ଅଲିଭା ସ୍ବାକ୍ଷରେ ।
ଶ୍ରାଦ୍ଧ ସିନା କରନ୍ତି ମାନବେ
ସାଧାରଣ ମଣିଷର ପାଇଁ
ମୃତ୍ୟୁପରେ ରଖିବାକୁ ମନେ,
ସ୍ମୃତି ତା’ର ନ ଦେଇ ହଜାଇ ।
ଶାଳପ୍ରାଂଶୁ ଉତ୍ତୁଂଗ ବ୍ୟକ୍ତିତ୍ବ
ଭିଡ ମଧ୍ୟେ ପାରେ କି ରେ ହଜି,
ହଜି ପାରେ ମହାଦୃମ କି ରେ
ତୃଣ ଭୂମି ମଧ୍ୟେ ଯଦି ଖୋଜି ।
ମୃତ୍ତିକାର ମୂର୍ତ୍ତିକାର ଯିଏ
ମାଟି ତାକୁ କରେ କି ରେ କ୍ଷୟ
ମୁକୁଳିତ ମୃତ୍ୟୁହୀନ ପ୍ରାଣ
କାଳ ଗର୍ଭେ ହୁଏ କି ବିଲୟ ।
ଧରଣୀର କୃଷ୍ଣସାର ମୃଗ
ଧରଣୀରେ ଲଭିଛି ବିଶ୍ରାମ,
କଳିଂଗର ମହାରଥୀ ବାରେ
ଯୁଦ୍ଧପରେ ନେଉଛି ବିରାମ ।
ଆଜିର ଏ ଶ୍ରାଦ୍ଧ ବାର୍ଷିକୀରେ
ଏହା ଅଟେ ଅନୁରୋଧ ଆମ,
ପୁନର୍ବାର ଜାଗିଉଠ ହେ ତୁଂଗପୁରୁଷ,
ସାରିବାକୁ ଅଧାଗଢା କାମ ।