ପଖାଳ ଦିବସ

ସଜ ପଖାଳରେ

ଦହି ପଡ଼ିଥିବ

ଭାସୁ ଥିବ ଆମ୍ବ କଷି ,

ବଡ଼ି ଚୂରା ସାଥେ

ଧଣିଆ ଚଟଣି

ବାସୁ ଥିବ ବେଶି ବେଶି । 

ଚିଙ୍ଗୁଡ଼ି କଲରା

ରାଇତା ସାଙ୍ଗକୁ

ଗୋଟା ବାଇଗଣ ଭଜା ,

ଭେଣ୍ଡି ପୋଡ଼ା ସାଥେ

ରସୁଣ, ତେନ୍ତୁଳି

କଞ୍ଚା ଲଙ୍କା ଦେବ ମଜା ।

ଲେଉଟିଆ ଶାଗ

ଲେଉଟି ଚାହୁଁଛି

କଷି କାକୁଡ଼ିକୁ ଦେଖି ,

ଡେଙ୍ଗୀ ମହୁରାଳି 

କଣେଇ କଣେଇ

ଇଲିଶି କୁ ମାରେ ଆଖି ।

ଓଡ଼ିଆଙ୍କ ପ୍ରାଣ

ପଖାଳ କଂସାରେ

ହଂସା ରହି ଯିବ ଅଟକି ,

ବିଶ୍ବ ବୁଝି ଗଲା

ଟଙ୍କ ତୋରାଣିରେ

ଜଗା ରହେ କିଆଁ ଲଟକି ।

ପଖାଳ ଦିବସ

ରଖେ ମାନ ଯଶ

ଝରେ ଗୌରବ ବରଷା ,

ଅଂଶୁଘାତେ ଡର

ନଥିବ କାହାର

ପଖାଳକୁ କଲେ ଭରସା ।